Gaalkacyo (Caasimada Online) Maamulka Galmudug ayaa ka digay lacagaha been abuurka ah ee la soo galiyo deegannada uu ka arimiyo.
Agaasimaha wasaaradda maaliyadda maamulka Galmudug Bile Diini Cali oo shir jaraa’id ku qabtay magaalada Gaalkayo ee xarunta gobolka Mudug ayaa sheegay in tallaabo sharci ah laga qaadi doono ciddii lagu arko iyadoo soo galineysa suuqyada lacago been abuur ah.
Agaasimaha ayaa sidoo kale u digay ganacsatada gobolka Mudug gaar ahaan kuwa nool Galmuudg in ay is-ticmaalaan lacagtaas oo hadda qeybo badan soo gashay suuqyada.
Wuxuu kaloo tilmaamay in lacagtaas ay keenayso uun sicir-barar iyo dhaqaalo xumo soo wajada bulshada reer Galmudug sida uu hadalka u dhigay.
Agaasime Bile ayaa shaaciyay in la sameeyay lacago loo ekeesiiyay kuwa saxda, si loogu jahwareeriyo suuqada iyo bulshada, taasoo haddii ay suuqa soo gashay ku keeni karta ayuu yiri sicir barar iyo dhaqaale dari baahsan.
Waxay ku soo aadaysaa digniintan iyadoo maamulka Puntland uu isna ka dilay in suuqyada ay soo galeen lacago been abuur ah, kuwaasoo la damacsan in dadka lagu jahwareeriyo.
Si kastaba,magaalada Gaalkacyo ee gobalka Mudug oo ay ka arrimiyaan maamulada Puntland iyo Galmudug, waxa ay xudun u tahay ganaciga lookala waarido koonfurta iyo waqooyiga Soomaaliya iyo dhulka is-maamulka Soomaalida ee Ethiopia.
Caasimada Online
Xafiiska Wararka Gaalkacyo
