Baydhabo (Caasimadda Online) – Wararka ka imaanaya magaaladda Baydhabo ee xarunta gobalka Baay ayaa muujinaya in wali aan lagu guuleysan in laga adkaado abaarta ku dhufatay deeganaddaas.
190 kaam oo ay dad soo barakacay dagan yihiin ayaa ku yaala magaaladda Baydhabo ee xarunta gobalka Baay waxaana la aaminsan yahay in dad labo boqol iyo sodon kun ka badan ay dagan yiiin xerooyinkaas.
Guddoomiyaha guddiga abaaraha ee K/galbeed Madoobe Nuunoow ayaa sheegay in aan wali lagu guuleysan in dhamaan dadka soo barakacay loo gurmado.
Isagoo ka hadlayay bartamaha xero ay dagan yihiin dad soo barakacay oo ku taalla Baydhabo waxaa uu sheegay Madoobe Nuunow in muhiim ay tahay in gar gaarka la kordhiyo si dadka loo bad baadiyo.
“Xiligii ugu adkaa ayey joogaan barakacayaasha K/Galbeed ilaa hada 190 xero ayaan furnay mana heyno wax ku filan oo raashin ah, waxaan ku guuleysanay inaan dajino, biyo siino amnigoodana aan sugno.
“Waxaa jira dad aan wali wax gar gaar ah helin, gobaladda waxaa ka jirta dhibaato daran, dadkii cuduro ayaa laayay, waan la hadlay hay’addaha deeqaha bixiya qaar waa ka jawaabeen qeyladeenii qaarna waxba kama soo qaadin, waxaan markale codsaneyna in dadkaan gurmad lala soo gaaro ayuu yiri Madoobe.
Dadkan oo xoolaleey iyo beerley ahaan jiray ayaa baahida waxaa ugu darsoomay cudduro uu ugu horeeyo Shubn biyood.
