Muqdisho (Caasimada Online) – Dhulgariir xooggan oo cabbirkiisu yahay 6.0 ayaa saqdii dhexe ee Jimcaha ka dhacay badda Gacanka Cadmeed, meel qiyaastii 145 kiiloomitir waqooyi kaga beegan degmada Caluula ee gobolka Bari, ayada oo la sheegayo in laga dareemay deegaano halkaas ka tirsan.
Hay’adda Sahanka Dhulka ee Mareykanka ee USGS ayaa sheegtay in dhulgariirku dhacay 12:07 habeenimo waqtiga Soomaaliya, isla markaana xaruntiisu ahayd meel badda hoosteeda ah oo qoto dheerkeedu gaarayo ku dhowaad 10 kiiloomitir.
Xarunta dhulgariirka ayaa ku taalla biyaha u dhexeeya waqooyi-bari Soomaaliya iyo Yemen, waxaana sidoo kale dhacdada xaqiijisay xarunta Jarmalka ee GFZ, oo diiwaangelisay dhulgariir cabbirkiisu yahay 6.0 isla waqtigaas.
Dhulgariirka ayaa sidoo kale ku beegnaa qiyaastii 165 kiiloomitir waqooyi-galbeed kaga beegan deegaanka Bareeda, halka uu ku dhowaad 209 kiiloomitir koonfur-bari kaga beegnaa magaalada Mukalla ee Yemen.
USGS ayaa soo saartay digniin heer Green PAGER ah, taas oo muujineysa in ay hooseyso suurtagalnimada dhimasho badan ama khasaare dhaqaale oo weyn.
Khariidadda qiimeynta gariirka ee hay’adda ayaa muujisay in gariirka ugu xooggan ee laga filan karo deegaannada ku dhow uu gaarayo heerka IV ee cabbirka Modified Mercalli, kaas oo guud ahaan lagu tilmaamo gariir fudud.
Ilaa hadda ma jiraan warar rasmi ah oo sheegaya dhimasho, dhaawac ama burbur weyn oo ka dhashay dhulgariirka, gaar ahaan deegaannada xeebaha waqooyi-bari Soomaaliya.
Sidoo kale, xogta la heli karo ma muujineyso khatar tsunami oo ka dhalatay dhulgariirka.
In kasta oo cabbirka 6.0 uu yahay dhulgariir awood u leh inuu sababo gariir xooggan, haddana xarunta dhacdadan oo ku taalla meel ka baxsan xeebaha ayaa yareysay khatarta degdegga ah ee ku wajahan deegaannada dadku ku badan yahay.
Maamulka Puntland weli kama soo saarin war rasmi ah oo ku saabsan khasaaraha ama saameynta dhulgariirka.