Muqdisho (Caasimada Online) – Markab xamuul ah ayaa lagu afduubtay meel ka baxsan xeebaha Soomaaliya, kadib markii koox hubeysan ay u suuragashay inay fuusho markabka oo ay la wareegto gacan-ku-hayntiisa.
Hay’adda Hawl-gallada Ganacsiga Badda ee UK (UKMTO) ayaa sheegtay in dhacdadu ay dhacday Isniintii, iyadoo soo saartay digniin ku aaddan xaaladda amni ee markabka iyo nawaaxiga xeebaha Soomaaliya.
Sida lagu sheegay warbixinta UKMTO, dhacdadu waxay ka dhacday qiyaastii afar mayl-badeed koonfur kaga beegan xeebaha Soomaaliya.
Sarkaalka amniga ee shirkadda markabka ayaa hay’adda u sheegay in siddeed nin oo hubeysan oo aan fasax u haysan inay markabka fuulaan ay gudaha u galeen, kadibna ay gacanta ku dhigeen markabka.
Ilaa hadda ma cadda cidda iska leh markabka la afduubtay iyo halka uu ku wajahnaa, iyadoo UKMTO aysan bixin faahfaahin dheeraad ah oo ku saabsan markabka ama kooxda qabsatay.
Xeebaha Soomaaliya ayaa muddo dheer ahaa goob ay ka dhici jireen weerarro burcad-badeednimo, gaar ahaan intii u dhaxeysay 2008 iyo 2018, xilligaas oo maraakiib badan lagu afduubtay.
Inkasta oo tallaabooyin amni iyo iskaashi caalami ah ay horseedeen hoos u dhac weyn oo ku yimid falalka burcad-badeednimada, haddana weerarro iyo afduubyo cusub ayaa dib uga soo muuqday xeebaha Soomaaliya dhammaadkii 2023.
Dhacdadan cusub ayaa sare u qaadaysa walaaca laga qabo in burcad-badeednimadu ay mar kale ku soo xoogeysanayso xeebaha Soomaaliya, iyadoo hay’adaha amniga iyo kuwa maraakiibta ay si dhow ula socdaan xaaladda.