Amman (Caasimada Online) – Iran ayaa gantaallo ballistic ah ku weerartay laba saldhig oo ciidamada Mareykanku ku leeyihiin Jordan, iyadoo sheegtay in tallaabadan ay jawaab u tahay duqeyn Mareykanku ka geystay jasiiradda Larak ee koonfurta Iran.
Ilaalada Kacaanka Iran ee IRGC ayaa sheegtay inay weerar isku dhaf ah oo gantaallo iyo diyaaradaha aan duuliyaha lahayn ah ku qaaday saldhigyada King Hussein iyo Al Azraq, oo ay ku sugan yihiin ciidamo Mareykan ah. Reuters ayaa sidoo kale xaqiijisay in IRGC ay sheegatay weerarrada labada saldhig.
IRGC ayaa howlgalka ugu magac dartay “Ciqaabta Gardarrada”, waxayna sheegtay in weerarradu burburiyeen kaabayaal farsamo iyo kuwa dayactirka, iyo goobo ay diyaaradaha dagaalka ku sugnaayeen.
Ma jiro weli xaqiijin madax-bannaan oo muujineysa baaxadda khasaaraha ay Iran sheegatay.
Warbaahinta Mareykanka oo soo xiganeysa ilo rasmi ah ayaa sheegtay in ku dhowaad dhammaan gantaalladii kusoo socday ciidamada Mareykanka la qabtay, isla markaana aan ilaa hadda la soo sheegin wax saameyn weyn ah. Axios ayaa sidoo kale ku warrantay in Iran ay adeegsatay gantaallo ballistic ah.
“Gardarrada iyo dambiyadu xal uma noqon doonaan quusta cadowga ee isku dayga lagu wiiqayo awoodda Jamhuuriyadda Islaamiga ah ee Marinka Hormuz, weerar kastana waxaa looga jawaabi doonaa jawaab ka sii burbur badan,” ayay IRGC ku tiri bayaankeeda.
Weerarka Iran ayaa yimid saacado kadib markii ciidamada Mareykanku duqeeyeen laba goobood oo gantaallada laga rido oo ku yaalla jasiiradda Larak, oo ku dhow Marinka Hormuz.
Sarkaal Mareykan ah ayaa sheegay in ciidamada IRGC lagu arkay iyagoo isku diyaarinaya inay gantaallo u adeegsadaan gelinta miinooyin badeed gudaha marinka muhiimka ah, taas oo Washington ay sheegtay inay sababtay weerarka.
Warbaahinta Iran ayaa sheegtay in weerarka Mareykanka lagu dilay laguna dhaawacay askar ka tirsan IRGC iyo dad rayid ah, inkastoo Tehran aysan shaacin tiro rasmi ah. Ilaalada Kacaanka ayaa markaas ballanqaaday “jawaab iyo ciqaab”.
Duqeynta Larak ayaa noqotay weerarkii ugu horreeyay ee la og yahay ee Mareykanku gudaha Iran ka fuliyo tan iyo dabayaaqadii July, xilli dagaalka labada dhinac uu toddobaadyadii dambe galay xaalad hakad iyo iska horimaadyo goos-goos ah.
Xiisadda ugu weyn ayaa hadda ku wareegsan Marinka Hormuz, oo ah marin istaraatiiji ah oo kahor dagaalka ay mari jirtay ku dhowaad shan meelood meel shidaalka dunida.
Madaxweyne Donald Trump ayaa toddobaadkii hore sheegay in miinooyinkii ku jiray marinnada caalamiga ah ee Hormuz la qarxiyey ama laga saaray, isagoo Iran uga digay in markab kasta oo isku daya inuu miinooyin cusub dhigo la burburin doono.
Tehran, dhinaceeda, waxay ku adkeysaneysaa inay weli awood u leedahay inay xakameyso isu-socodka marinka, waxayna diidday sheegashada Washington ee ah in Hormuz si buuxda dib loogu furay maraakiibta caalamiga ah.
Mareykanka iyo Israel ayaa dagaalka Iran bilaabay 28-kii February, iyadoo Tehran ay jawaab uga bixisay weerarro ay ku qaaday Israel iyo saldhigyo ay ciidamada Mareykanku ku leeyihiin dalal dhowr ah oo gobolka ah.
Dagaalka oo hadda dhaafay lix bilood ayaa sababay dhimashada kumannaan qof, barakaca malaayiin kale iyo carqalad weyn oo ku timid ganacsiga iyo isu-socodka shidaalka ee Marinka Hormuz.
Weerarrada cusub ee Larak iyo Jordan ayaa muujinaya dib u soo xoogeysiga iska horimaadka tooska ah ee Washington iyo Tehran, xilli dadaallo diblomaasiyadeed oo lagu doonayo in dib loogu furo Hormuz aysan weli dhalin heshiis.