Addis Ababa (Caasimada Online) – Midowga Afrika ayaa AUSSOM u fasaxay inay ciidamada dowladda federaalka kala qeyb-gasho howlgallada militari ee Koonfur Galbeed, xilli madaxweynihii hore Cabdicasiis Laftagareen uu uga digay howlgalka inuu ku lug yeesho khilaafka siyaasadeed ee gobolka.
Qoraal gudaha ah oo Midowga Afrika soo saaray 21-kii August, oo ay heshay Caasimada Online, ayaa AUSSOM u oggolaanaya inay dowladda kala qeyb-gasho dagaalka ka dhanka ah Al-Shabaab iyo kooxo hubeysan oo lagu sheegay inay xiriir la leeyihiin kooxdaas.
Hase yeeshee, isla qoraalka ayaa AUSSOM ku amraya inay ilaaliso dhex-dhexaadnimadeeda siyaasadeed, kana fogaato “khilaafaadka siyaasadeed ee gudaha”.
Arrintan ayaa muhiimad gaar ah leh, maadaama dowladda federaalka iyo mas’uuliyiinta Koonfur Galbeed ay ciidamo daacad u ah Laftagareen ku eedeeyeen inay Al-Shabaab kala qeyb-qaateen dagaallo ka dhacay Baydhaba, halka garabkiisu uu si adag u beeniyay eedeynta.
Qoraalka ayaa sidoo kale xaqiijinaya in dowladda federaalka Soomaaliya ay si rasmi ah Midowga Afrika uga codsatay in AUSSOM ay farageliso xaaladda amni ee Koonfur Galbeed.
Waaxda Arrimaha Siyaasadda, Nabadda iyo Amniga ee Guddiga Midowga Afrika ayaa qoraalka, oo summaddiisu tahay CPAPS/B3/779.26, u dirtay madaxa howlgalka AUSSOM.
Cinwaanka qoraalka ayaa si toos ah u xusaya gudbinta warqad ay dowladda federaalka ku codsatay “faragelinta AUSSOM ee xaaladda amni ee Koonfur Galbeed”.
Guddiga Midowga Afrika ayaa sheegay inuu si weyn uga walaacsan yahay xaaladda gobolka, isaga oo xusay warar sheegaya inuu jiro “isbahaysi sii kordhaya” oo u dhexeeya maleeshiyaad maxalli ah iyo Al-Shabaab.
Waxa uu sheegay in xiriirkaas la sheegay uu horseeday weerarro abaabulan oo lagu qaaday ciidamada dowladda Soomaaliya gudaha iyo hareeraha magaalada Baydhaba.
Hase yeeshee, qoraalka Midowga Afrika ma magacaabayo maleeshiyaadka uu ku tilmaamay inay xiriir la leeyihiin Al-Shabaab, mana soo bandhigayo caddeymo muujinaya xiriirkaas.
Laftagareen oo u digay AU
Go’aanka Midowga Afrika ayaa kusoo aadaya xilli dowladda federaalka iyo ciidamo daacad u ah madaxweynihii hore ee Koonfur Galbeed Cabdicasiis Xasan Maxamed Laftagareen ay ku jiraan khilaaf siyaasadeed iyo mid hubeysan.
Garabka Laftagareen ayaa Khamiistii Midowga Afrika uga digay inuu ku lug yeesho iska horimaadka, isagoo sheegay in tallaabadaasi ay dhaawici karto dhex-dhexaadnimada AUSSOM.
Waxa uu sidoo kale si adag u diiday eedeymaha ah in ciidamadiisu ay xiriir la leeyihiin Al-Shabaab.
Laftagareen ayaa sheegay in dagaalyahannadaasi ay yihiin ciidamo ka tirsan Daraawiishta Koonfur Galbeed, wuxuuna ka digay in khilaaf siyaasadeed oo gudaha ah loo beddelo qayb ka mid ah dagaalka lagula jiro Al-Shabaab.
Qoraalka Midowga Afrika hase yeeshee ma magacaabayo Laftagareen, ciidamadiisa ama dhinac kale oo siyaasadeed.
Sidoo kale, laguma lifaaqin warqaddii dowladda federaalka ay u dirtay Midowga Afrika ee saldhigga u ahayd codsiga faragelinta AUSSOM.
Sidaas darteed, qoraalka keliya ma caddeynayo eedeymaha gaarka ah ama caddeymaha ay dowladda federaalka u gudbisay Midowga Afrika.
Waxaa kale oo qoraalka lagu xusay qoraal hore oo madaxa AUSSOM uu diray 19-kii August, balse nuqulka ay heshay Caasimada Online kuma jirin qoraalkaas.
Dagaalkii ka dhacay Baydhaba
Dagaal culus ayaa 17-kii August ka dhacay magaalada Baydhaba, kaas oo dhexmaray ciidamada dowladda federaalka iyo dagaalyahanno daacad u ah Laftagareen.
Wasaaradda Gaashaandhigga Soomaaliya ayaa sheegtay in ciidamada dowladda ay dileen ku dhowaad 30 dagaalyahan, kadib markii weeraryahanno adeegsanayay gaadiid laga soo buuxiyey walxaha qarxa ay waaberigii weerareen fariisimo dowladeed.
Ciidamada federaalka ayaa markii dambe dagaalyahannada ka saaray magaalada, kadib saacado dagaal ah.
Mas’uuliyiin ka tirsan dowladda federaalka iyo maamulka Koonfur Galbeed ayaa markii dambe ku eedeeyey ciidamada taageersan Laftagareen inay Al-Shabaab kala qeyb-qaateen weerarka.
Laftagareen ayaa eedeyntaasi beeniyay.
Muranka ku saabsan cidda ay yihiin kooxaha hubeysan ayaa hadda noqday qodobka ugu xasaasisan ee go’aanka Midowga Afrika, maadaama AUSSOM loo oggolaaday inay la dagaallanto kooxaha xiriirka la leh Al-Shabaab, balse isla waqtigaas laga mamnuucay inay ku milanto khilaaf siyaasadeed.
Amar dhex-dhexaadnimo
Midowga Afrika ayaa sheegay in oggolaanshaha la siiyey AUSSOM uu waafaqsan yahay waajibaadka howlgalka ee la dagaallanka argagixisada, ilaalinta shacabka iyo sugidda xarumaha muhiimka ah ee dowladda.
Qoraalka ayaa tixraacaya qaraarro ay soo saareen Golaha Ammaanka ee Qaramada Midoobay iyo Golaha Nabadda iyo Ammaanka ee Midowga Afrika, kuwaas oo hagaya howlgalka AUSSOM.
Waxaa howlgalka lagu faray inuu sii wado taageerada ciidamada Soomaaliya, isagoo dhowraya sharciga caalamiga ah ee bani’aadannimada iyo xeerarka u degsan howlgalladiisa.
Hase yeeshee, qoraalka ayaa si cad u kala saaraya howlgallada ka dhanka ah Al-Shabaab iyo kooxaha xiriirka la leh, oo AUSSOM loo fasaxay inay taageerto, iyo khilaafaadka siyaasadeed ee laga doonayo inay ka fogaato.
Kala saariddaas ayaa ah xudunta muranka hadda taagan.
Dowladda federaalka iyo mas’uuliyiin ka tirsan Koonfur Galbeed ayaa ciidamo taageersan Laftagareen ku eedeeyey xiriir iyo wada-shaqeyn Al-Shabaab, halka garabkiisu uu taas beeninayo, kuna adkeysanayo in dagaalka uu yahay khilaaf siyaasadeed oo kala dhexeeya dowladda federaalka.
Laftagareen ayaa 30-kii March iska casilay xilka madaxweynaha Koonfur Galbeed, kadib markii ciidamada federaalka ay la wareegeen magaalada Baydhaba.
Taageerayaashiisa ayaa tan iyo xilligaas kasoo horjeeday maamulka lagu beddelay, iyagoo ku doodaya in xilka looga qaaday si sharci-darro ah.
Khilaafka ayaa tan iyo markaas sababay iska horimaadyo hubeysan oo soo noqnoqday, iyadoo dowladda federaalka iyo garabka Laftagareen ay weli isku hayaan maamulka iyo gacan-ku-haynta Koonfur Galbeed.
Midowga Afrika ayaa sidoo kale AUSSOM ku amray inay si joogto ah ula socoto xaaladda amni ee Koonfur Galbeed, isla markaana warbixinno joogto ah u gudbiso xarunta dhexe ee Midowga Afrika.