Shariif oo sheegay in dowladdu weerarayso mucaaradka kadib safarkii Imaaraadka

Bookmark
Bookmarked

Share

Muqdisho (Caasimada Online) – Madaxweynihii hore ee Soomaaliya, Shariif Sheekh Axmed oo kasoo laabtay safar uu ku tegay dalka Imaaraadka Carabta ayaa sheegay in dowladda uu hoggaamiyo Madaxweyne Xasan Sheekh ay uga qiil dhiganayso safarkiisa si ay u weerarto hoggaanka mucaaradka.

“Imaaraadka waan degenahay, saddex maalin ayaa soo joogay, caruurteyda degan, arrimo qoys ayaa u tegay. Weligay ayaa deganaa oo tegi jiray. Ma noqon karto asbaab lagu baneysan karo dhiigga dadka mucaaradka ah ee u taagan in dastuurka la ixtiraamo oo doorashadana laga heshiiyo,” ayuu yiri Shariif.

Waxa uu intaas kusii daray “Ma jirto sabab farta loogu fiiqi karo (mucaaradka). Waxaa la fahamsan yahay in cidda dhibaatada wada inay tahay cidda kale (dowladda).”

Shariifka ayaa hoggaanka dowladda ku eedeeyay in si qaldan u adeegsanayo hay’adihii kala duwanaa ee dowladda iyo ciidamadii qaranka oo dadka lagu dhibaateynayo, sida uu hadalka u dhigay.

“Hadii dastuurka laga tago wadda-hadaladana la iska diido, jihada la aadayo waa la yaqaan, suuragalna ma ahan in la yiraahdo mucaarad ayaa la wareerayaa,” ayuu yiri.

Waxa uu intaas kusii daray “Dalkii wuxuu kusoo koobnay hal gacan, mas’uuliyadaas haddii wax ka dhacaan dalka ama dagaal ka dhaco waxay taabaneysa hoggaanka dowladda iyo xukuumadda ka shaqeynaysa ee hantidii qaranka ku bixinaysa in dhiig la daadsho.”

Shariif ayaa ka digay in tegitaanka mucaaradka ee Imaaraadka loogu qiil sameysto weerar lagu qaado, xilli dhawaan Wasiirka Gaashaandhigga Soomaaliya uu soccaalka mucaaradka ee Abu Dhabi la xiriiriyay qorshe abaabul dagaal oo mucaaradka ka bilaabayo Muqdisho.

Fiqi ayaa ku eedeeyay siyaasiyiinta mucaaradka ah inay Abu Dhabi kula kulmeen dhinacyo xiriir la leh RSF, isagoo sheegay in kulamadaasi ay la xiriiraan qorshayaal looga soo horjeedo dowladnimada Soomaaliya.

Wasiirka ayaa sidoo kale ku eedeeyay mucaaradka in ay la soo noqon doonaan shirqoollo ka dhan ah dowladnimada iyo nabadda, ayna isku dayi doonaan inay maleeshiyaad uruuris iyo hoggaamiye-kooxeednimo bilaabaan, sida uu hadalka u dhigay.

Dowladda Soomaaliya ayuu sheegay inay waajib ku tahay inay si adag uga hortagto cid walba oo halis gelinaysa nabadda iyo dowladnimada, qaranimada iyo madax-bannaanida dalka. “Khaa’inul-wadan kastaana abaalkiisa la marsiin doono,” ayuu Fiqi ku yiri qoraal uu dhawaan soo saaray.

Si kastaba, arrimahan ayaa imanaya xilli xiisadda siyaasadeed ee dalka ay mareyso meel xasaasi ah, isla markaana ay mucaaradka iyo dowladda isku mari la’yihiin doorashooyinka iyo wax ka beddelka dastuurka oo dowladdu meel-marsatay ayna dhaqan-gelinayso.

Hoos ka daawo muuqaalka

- Advertisement -

Read more

Local News