Washington (Caasimada online) — Madaxweyne Donald Trump ayaa ku hanjabay in Mareykanku duqeyn doono Cumaan haddii dalkaasi uu “caqabad ku noqdo” dadaallada Washington ee lagu doonayo in heshiis nabadeed lala gaaro Iran.
“Haddii Cumaan ay jidka naga hor istaagto, si daran ayaan u duqeyn doonnaa,” ayuu sheegay weriyaha Fox News Trey Yingst in Trump uu yiri intii lagu jiray wareysi telefoon oo dhacay Isniintii.
Sida uu Yingst sheegay, Trump ayaa tilmaamay in ciidamada Mareykanka ay weerari karaan dalka Khaliijka ku yaalla haddii uu farageliyo go’doominta maraakiibta Iran ee maraya marin-biyoodka Hormuz.
Madaxweynaha ayaa sheegay in go’doomintaasi ay cadaadis saarayso Iran, balse ma uusan sheegin waqti cayiman oo dagaalka lagu soo afjarayo, isaga oo sheegay inuusan degdegsaneyn.
Wada-xaajoodayaal Iranian ah ayaa toddobaadyadii lasoo dhaafay wada-hadallo la yeeshay Cumaan, kuwaas oo ku saabsan heshiis ku-meel-gaar ah oo lagu maareynayo isu-socodka maraakiibta ee marin-biyoodka Hormuz. Wada-hadalladaas ayaa weli socda, mana aysan dhalin wax natiijo la taaban karo.
Militariga Iran ayaa dhankiisa sii waday inuu rasaas ku furo maraakiibta isku dayaya inay maraan marin-biyoodka iyaga oo aan fasax ka haysan Tehran, iyadoo Iran ay dooneyso inay sii haysato awoodda ay ku xakameyso isu-socodka ganacsiga ee halkaas mara.
Si ka duwan bilowgii dagaalka, markii Mareykanku weerarrada noocaas ah uga jawaabi jiray duqeymo uu ku qaado bartilmaameedyo Iranian ah oo ku yaalla hareeraha marin-biyoodka, Washington ilaa hadda kama aysan jawaabin dhacdooyinkii ugu dambeeyay, arrintaas oo niyad-jab ku abuurtay qaar ka mid ah xulafadeeda Khaliijka.
Toddobaadkii hore, ciidamada Mareykanka ayaa rasaas ku furay markab watay calanka Panama oo isku dayay inuu jebiyo go’doominta Mareykanka ee dekedaha Iran, tallaabadaas oo muujisay in Washington ay adkeyneyso hirgelinta xannibaadaha badda, xilli ay isku dayeyso inay dowladda Iran cadaadis dhaqaale saarto.
Markii uu dagaalku billowday, mas’uuliyiinta Cumaan ayaa si degdeg ah u sameeyay marin xiriir oo aan rasmi ahayn oo ay la yeeshaan Tehran. Sida ay sheegeen mas’uuliyiin Carbeed, xiriirkaas ayaa gacan ka geystay in dalalka Khaliijku dib u furaan marinnada duulimaadyada.
Dadaalka Muscat ay ku dooneyso inay dhexdhexaadiye aan dhinacna raacsaneyn ka noqoto Khaliijka ayaa caro ku abuuray qaar ka mid ah mas’uuliyiinta Mareykanka, kuwaas oo ay sii kordhayso aragtidooda ah in habka Cumaan uu khilaafsan yahay danaha Washington.
Iran ayaa tan iyo markii dagaalku billowday weerarro xiriir ah ku qaaday goobo ku yaalla Cumaan, kuwaas oo ay ku jireen weerarro diyaaradaha aan duuliyaha lahayn ah oo lagu qaaday dekedo ay isticmaalaan ciidamada Mareykanka.
Bishii June, wargeyska The Wall Street Journal ayaa sheegay in maamulka Trump uu ugu hanjabay Cumaan cunaqabateyn iyo duqeyn, kadib markii qiimeyn sirdoon ay soo jeedisay in Muscat ay qorsheyneysay inay Iran kala qeybqaadato lacag laga qaado maraakiibta maraysa marin-biyoodka istaraatiijiga ah.
Cumaan ayaa marar badan beenisay inay leedahay qorshe noocaas ah.
Dagaalka ayaa hadda socday ku dhowaad lix bilood, wuxuuna sare u qaaday qiimaha shidaalka iyo gaaska, xilli ay soo dhow yihiin doorashooyinka dhexe ee Mareykanka ee November.
Wada-hadalladii nabadeed ee Mareykanka iyo Iran ayaa hakad galay, halka iska horimaadyo goos-goos ah ay weli carqaladeynayaan isu-socodka shidaalka iyo badeecooyinka kale ee mara marin-biyoodka Hormuz oo muhiimad weyn u leh ganacsiga caalamka.
Qoraal uu Isniintii ku daabacay bartiisa Truth Social, Trump ayaa sheegay in “hadafkiisa koowaad” uu weli yahay in la xaqiijiyo in Iran “aysan sinaba, qaabna, ama xaalad kasta ugu yeelan karin hub nukliyeer ah.”