Boosaaso (Caasimada Online) – Wararka naga soo gaaraya gobolka Bari ayaa sheegaya in maanta ciidamada ammaanka Puntland ay ka hortageen weerar xooggan oo ay soo abaabushay kooxda Daacish ee ku sugan aagga Togga Miraale oo ay Jimcihii shalay la wareegeen ciidanku, kadib howlgallo iyo dagaallo culus oo ka dhacay halkaasi.
Ciidamada oo ka war helay abaabulka weerarkan ayaa cagta mariyay koox ka tirsan Daacish oo dooneysay inay qaadaan weeraro gaadmo ah, iyada oo qaraxyo ismiidaamin ah laga maqlay goobta.
Saraakiil ka tirsan Daraawiishta Puntland oo la hadlay warbaahinta ayaa shaaciyay inay dileen xubnaha qorsheynayayay oo u badnaa ajaaniib, waxaana sidoo kale maydadkooda soo bandhigtay Puntland.
Weerarkan ayaa kusoo aaday, xilli ciidamadu ay howlgal sifeyn ah ay ka wadeen aagga Togga Miraale oo shalay laga qaybtay kooxda Daacish, waxayna ahayd xarunta ugu weyn ee Daacish ee gobolka.
Togga Miraale ayaa horey u ahaa mid adag in la galo, iyadoo ciidamada ay la kulmeen caqabado dhanka deegaanka ah iyo dhufeyso adag oo ay sameysteen kooxda Daacish. Balse, ciidamada ayaa si taxaddar leh u wajahaya howl-gallada ilaa ay ugu dambeyn gudaha u galeen.
Marka loo eego warbixinada ka imaanaya goobaha dagaalka, wejiga saddexaad ee hawl-galka buuraha Calmiskaad ayaa la sheegay inuu marayo gebagabo.
Kooxda Daacish ee firxadey ayaa hadda lagu sheegay inay ku sugan yihiin meelo kooban oo aan lahayn difaac buuxa.
Waxaa sidoo kale la sheegay in ciidamada ay gacanta ku dhigeen saldhigyo istiraatiiji ah, kuwaas oo muhiim u ahaa isku xirka kooxda, taasoo hoos u dhigtay awooddii xiriirka iyo abaabulkooda gudaha gobolka.
Madaxweynaha maamul goboleedka Soomaaloyeed ee Puntland, Saciid Cabdullaahi Deni, ayaa lagu wadaa inuu jeediyo khudbad ka turjumeysa guulaha laga gaaray dagaalkan, isagoo shacabka la wadaagi doona xogta rasmiga ah ee howl-gallada iyo tallaabooyinka xiga ee lagula tacaali doono kooxaha khatarta ku haya amniga Puntland.