Muqdisho (Caasimada Online) – Sida aan wararkeena hore ku sheegnay waxaa magaalada Kismaayo kulan khaasa ku yeeshay Madaxweynaha JFS Maxamed C/llahi Farmaajo iyo Hogaamiyaha maamulka Jubbaland Axmed Madoobe.
Labada mas’uul ayaa si qoto dheera uga wadahadlay arrimo dhowr ah oo ku saleysan danaha dalka, waxaana la soo sheegayaa inay isku fahmi waayen qodobo gaara.
Waxaa kamid ahaa qodobada ay isku fahmi waayen in Jubbaland ay DF kusoo wareejiso Dekadda, Garoonka, Goobaha ilaha dhaqaale iyo Diiwaanka Saldhigyada iyo ciidamada maamulka oo si toosa loo hoosgeynaayo DF.
Madaxweynaha dalka ayaa Hogaamiyaha maamulka usoo jeediyay in qodobada kor ku xusan laga dhabeeyo isla markaana sida ugu dhaqsiyaha badan loogu wareejiyo dowlada.
Hogaamiyaha Jubbaland ayaa ka biya diiday laba qodob oo ay kamid yihiin wareejinta Dekadda, Garoonka iyo Goobaha caanka ku ahaa wax soo saarka.
Hogaamiyaha waxa uu ogolaaday in dowlada Federaalka ay maamusho keliya ciidamada iyo Saldhigyada oo ay usoo magacaabikarto wakiilo.
Sidoo kale, Axmed Madoobe ayaa ka meermeeray Heshiiskii Addis Ababa lagu gaaray sanadkii 2013 oo dhigaayay in Maamulka Jubbaland uu dowladda Federaalka ku wareejiyo lix bil kaddib maamulka Dekeda iyo Garoonka.
Jubbaland ayaa shuruudo ka dhiganeysa in marka hore gacanta dowlada lagu soo celiyo dhammaan ilaha dhaqaale ee iminka ku jira gacanta maamulada.
Si kastaba ha ahaatee, waxaa si hoose u socda dadaalo dhinacyo badan leh oo lagu suuragalinaayo in Hogaamiyaha Jubbaland uu qaato soo jeedinta Madaxweynaha.
Caasimada Online
Xafiiska Muqdisho
[email protected]