Kismaayo (Caasimada Online) – Hogaamiyaha maamulka Jubbaland Axmed Madoobe ayaa shaaca ka qaaday in DFS ay ka talaabeyso nidaamkii lagu balamay in dib loogu soo celsho hay’adaha dowlada.
Axmed Madoobe ayaa sheegay in DFS looga baahan yahay inay ka fiirsato talaabooyinka ay dooneyso inay kusoo celiso Hay’adaha dowlada ee aan qaarkood wali loogu sameyn dib u shaqeysiinta.
Waxa uu tilmaamay in DFS ay dooneyso in muddo kooban ay kusoo nooleyso dhammaan sharciyada ay ku shaqeyn jireen Hay’adaha dalka, waxa uuna talaabadaasi ku sheegay mid sii carqaladeyn doonta nidaamka bilowga ah ee loo maraayo dib usoo nooleynta Hay’adahaasi.
”Waxaa jira Hay’ado dhowr ah oo aan u dhisneyn DFS balse u dhisan maamul Goboleedka, haddii la yiraahdo waxaa si degdeg ah lagu soo celinayaa Hay’adahaasi waxaa ka dhalankara dhibaatooyin dhowr ah”
”Waxaan ku baaqayaa in DFS ay adeegsato maskax ka duwan tan ay hadda ku shaqeyneyso, waxaa wakhti badan qaadan kara in Hay’adahaasi ay sida KMG ah ugu shaqeeyan maamul Goboleedyada si dhaqsi ah loogu wareejiyo dowlada”
Axmed Madoobe waxa uu soo hadalqaaday talaabada ay DFS ku carqaladeyneyso heshiis dhawaan lagu gaara Jaziirada siishalis, kaa oo xal looga gaaray Kaluumeysiga.
Madoobe waxa uu sheegay inay jiraan cadeymo muujinaaya in shirkii ka dhacay Jaziirada siishalis xal looga gaaray barnaamijka Kaluumeysiga balse DFS ay beenisay Heshiiskaasi kuna tilmaantay mid fashilmay.
Waxa uu ka taliyay in DFS aysan hor istaagin heshiisyada ay goobjooga ka tahay, balse ay la gudboon tahay inay dalbato dib ugu laabashada Heshiiska ka hor inta aysan ka been sheegin xaqiiqda.
Tani ayaa kusoo beegmeysa xili dhawaan Wasiirka Kalluumeysiga iyo Kheyraadka Badda Soomaaliya uu dafiray Heshiiska Jaziirada siishalis.
Caasimada Online
Xafiiska Kismaayo