Beelaha Hawiye oo maanta Muqdisho ku shiray soo saaray go’aan muhiim ah

By Asad Cabdullahi Mataan

Muqdisho(Caasimada Online) – Waxaa maanta magaalada Muqdisho kulan xasaasi ay ku yeeshay masuuliyiin kala duwan oo matalaya beesha Hawiye kuwaasi oo ka hor imaanaday go’aano ay horay u qaadatay dowlada Soomaaliya.

Kulanka ayaa waxaa ka qeyb galay xildhibaano, wasiiro ka tirsan xukuumada Soomaaliya iyo waxgaradka beeshaasi kuwaasi oo dhamaantood isku mowqif wada ah.

Ujeedada ugu weyn ee kulankooda ayaa ah inay kasoo horjeedaan aqoonsiga dowlada Soomaaliya ee maamulka koofur galbeed iyo gudigii dhawaan dowlada ay u xilsaartay arimaha maamul u sameynta koofur galbeed.

Wasiiro ka tirsan xukuumada Soomaaliya ayaa ka qeyb galay kulankaasi oo ka dhacay magaalada Muqdisho, waxaana ay sheegeen dhamaantood in dowlada Soomaaliya ay u gaftay dastuurka u degsan dowlada Soomaaliya.

Xildhibaan Cabdulaahi Jaamac Xuseen, oo kamid ah xildhibaanada baarlamaanka Soomaaliya oo goobta ka hadlay ayaa sheegay in dowlada Xasan Sheikh Maxamuud ay ku fashilantay arimaha maamul goboleedyada Soomaaliya.

“Sharciga baarlamaanka waa la garabmay, dastuurka waa loo gafay waana la hareer maray”ayuu yiri xildhibaan Cabdulaahi Jaamac Xuseen.

Odayaasha goobta ka hadlay ayaa sidoo kale dhaliilo kala duwan u jeediyay masuuliyiinta ugu sareysa dalka, iyagoo ku eedeynaya hareer marida dastuurka u yaala dalka Soomaaliya.

Caasimada Online
Xafiiska Muqdisho
Caasimada@live.com