Muqdisho (Caasimada Online) Taliyaha ciidamada wadooyinka Cali Gaab ayaa galabta wuxuu qaaday dhagxaan la dhigay waddada u dhexeeya KM4 ilaa iyo garoonka diyaaradaha Muqdisho.
Sida uu saxaafadda u sheegay Cali Gaab, waxaa dhagxaanta dhigay kooxo qandaraas ka soo qaatay Xafiiska Qaramada Midoobe ee Soomaaliya sida uu hadalka u dhigay, wuxuuna intaas ku daray in dowladda iyo dhammaan hey’addaha iyo ciidamada wadooyinka aan lagu soo wargalin.
“Waxaan rabaa saxaafadda in aan galabta u sheegay waxaa laga billaabo KM4 iyo garoonka diyaaradaha Muqdisho la dhigay dhagxaan iyo jidgooyin kuwaasoo dhib ku ah dadka iyo gaadidka, tallaabadan dowladda iyo hey’addaha ammaanka lala socodsiin, marka waxaa sameeyay kooxo qandaraas ka soo qaatay QM, iyadoo caasimada ammaan ay tahay in wadooyinka muhiimka la xiro waa dhib kale” ayuu yiri Cali Gaab taliyaha ciidamada Taraafikada.
Si kastaba, gawaarida iyo dadka isticmaala waddada xiriirisaa KM4 iyo ilaa garoonka diyaaradaha ayaa dhib ku qaba dhagxaan la dhigay bartamaha jidka, taasoo aan la oegeyn sababaha ka dambeesa.
Sidoo kale waxa ay dadweynaha iyo baabuurta ay sheegayaan in la xiray waddada KM4 ilaa Tarabuunka, waxaana halkaas deggan Safaarada Turkiga ee Soomaaliya.
Caasimada Online
Xafiiska Wararka Muqdisho