Muqdisho (Caasimada Online) – Wararka aan ka heleyno deegaanada Puntland ayaa sheegaya in xal laga gaaray gadoodka ay maalmahaan sameynayeen ciidamada maamulkaasi.
Sida wararka aan ku heleyno waxaa xal laga gaaray ciidamada gadooday ee ku sugan koontaroolka koofureed ee magaalada Garowe ee gobolka Nugaal.
Arintaan xalinta ciidamada gadooday waxaa ku mashquulsanaa odayaal dhaqameed iyo qaarka mid ah saraakiishii hore ee ciidamada Puntland.
C/raxmaan Jaabiri Samatar oo kamid ah waxgaradkii ka qeyb galay xalinta gadoodka ciidamada maamulka Puntland ayaa sheegay in xal buuxa laga gaaray arimihii jiray.
“Odoyaasha, nabadoonada iyo waxgaradka gobolka Nugaal ayaa muddo ka shaqeynayey arrintaasi, qeyb ay si dadban isku arkayeen taliyaha iyo waxgaradka kale iyo qeyb ay si toos ah isku arkayeen, arrintaasi waa la xalliyey, waxaa lagu xalliyay arrintii Puntland ay ku dhisneyd ee ahayd golaha sharci dejinta, fulinta iyo dhaqanka” ayuu yiri Nabadoon Samatar.
Nabadoon C/laahi Maxamed Jibriil oo isna kamid ahaa waxgaradkii xalinayey tabashada ciidamada Puntland ayaa sheegay in la dhammeeyey cabashadii ay qabeen ciidankii qabsaday Koontaroolka Koonfureed ee Garoowe, laguna qanciyey iney ku laabtaan meelihii ay ka yimaadeen.
“Xal baa laga gaaray ciidamadana xeryahoodii bay dib ugu laabteen, isku socodkii iyo howlihii kalena sidoodii waaye, ciidamadana waan ku qancinnay iney ka tagaan Koontaroolka Koofurta Garoowe” ayuu yiri Nabadoonka.
Caasimada Online
Xafiiska Muqdisho
[email protected]