“Madaxweynaha beel beel ayuu inoogu yeeray isaga oo inaga dalbanayey in xukuumadan mooshin laga keeno”
Muqdisho (Caasimada Online) – Xildhibaan Maxamed Cabdi Yuusuf oo shalay ka hadlay fadhiggii baarlamanka ee mooshinka, ayaa ku tilmaamay mooshinka laga keenay Madaxweynaha in laga soo abaabulay Madaxtooyada, isagoo wax laga xumaado ku tilmaamay Xildhibaanada Baarlamaanka inay noqdaan kuwo shaqaale ah.
Isagoo ka hadlayay doodii kululeyd ee Xildhibaanada Baarlamaanka ka yeesheen mooshinka laga soo gudbiyay Ra’iisul Wasaaraha ayaa ugu baaqay Xildhibaanada inay noqdaan kuwo ilaaliya xushmada iyo nidaamka Baarlamaanka.
Waxa uu sheegay in mooshinkan uu yahay mid laga soo abaabulay madaxtooyada waxaana uu si gaar ah u sheegay inuu Madaxweynaha Soomaaliya ka danbeeyo mooshinkan oo isaga laftiisa goobjoog u ahaa madashii uu xildhibaanada arrintaasi kala hadlayey madaxweynaha.
“Madaxweynaha ayaa inoo yeeray inoo beelo ah iyo anagoo koox koox ah waxaana uu inaga dalbaday in aan mooshin ka keeno Ra’iisul Wasaaraha oo ay isqabteen isaga shaqsiyan. Waxaana cadeynayaa in qaarkeen fikirkaasi qaateen oo ay mooshinkan soo gudbiyeen ” ayuu yiri Xildhibaan Maxamed Abdi Yusuf.
Dhinaca kale waxaa uu sheegay in mooshin la keeno uusan danbi aheyn balse ay waajib tahay inuu dhexdooda ka yimaado oo aysan qolo kale ku shaqeysaneen. Isagoona tusaale usoo qaatay mooshinkii kan ka horeeyey oo uu sheegay inuu ahaa mid saxan oo ay baarlamaanka xaq u lahaayeen balse waagaasi ay madaxtooyada ka kala daadisay.
” Mooshinkan kii ka horeyeey ayaa sax ahaa sababtoo ah rabitaanka baarlamaanka dhexdooda ayuu ku yimid balse waxaa maalintaasi kala daadiyey madaxtooyada oo haddana u muuqata inay dan ay leedahay mooshinkan u adeegsaneyso xildhibaano” ayuu yiri Maxamed Abdi Yusuf.
Madaxweynaha ayuu ku eedeeyey inuu si sharciga baalmarsan uga dalbaday Ra’iisul wasaaraha iscasilo taasi oo markii danbe isu badelay madaxweynaha uu abaabulo mooshinkan, sidaasi darteedna aan baarlamanka loo ga fadhiyin inay shaqaale u noqdaan madaxtooyada.
” Baarlamaan waxaa laga doonayaa inaysan noqon shaqaale cid gaar ah u shaqeysa ee waa inay noqdaan kuwa cidkasta ay ka baqdo oo si xalal ah ku shaqeysa.” ayuu yiri Xildhibaan Maxamed Abdi Yusuf.
Inta uu hadalka waday ayaa waxaa socday buuq iyo sawaxan looga soo horjeeday hadalkiisa ku aadan Madaxweynaha inuu mooshinkan ka danbeeyey. Waxaase hadalka dhexdhexaadinayey Guddoomiyaha baarlamaanka Jawaari.
Dhinaca kale Xildhibaan Cali Khaliif Galeyr ayaa wax lala yaabo ku tilmaamay tallaabadii Xildhibaanada ku diideen inuu hor yimaado Baarlamaanka, isla markaana uu isu difaaco, waxaana uu sheegay in wax aan waligeed la arkin ay tahay.
Mooshinka hor yaala Baarlamaanka Soomaaliya ee ka dhanka ah Ra’iisul Wasaaraha ayaa ka dambeeyay markii Madaxweynaha iyo Ra’iisul Wasaaraha uu khilaaf soo kala dhex galay, waxaana la rumeysan yahay in abaabulka mooshinkan uu ka yimid Madaxtooyada, isla markaana dhaqaale fara badan lagu bixiyay.
Halkan hoose ka dhageyso Maxamed Cabdi
Isha: K24