Muqdisho (Caasimada Online) – Madaxweynaha Jabuuti ayaa markii ugu horreysay ka hadlay khilaafka u dhexeeya dowladda federaalka iyo maamulka Jubbaland.
Ismaaciil Cumar Geelle oo u warramay VOA ayaa sheegay in dowladdiisu ay aad uga xun tahay khilaafka ka dhex aloolsan madaxda dowladda dhexe iyo kuwa Jubbaland.
Sidoo kale wuxuu tilmaamay in khilaafkan uu cuuryaaminayo horumarka dowladninada iyo hiigsiga dadka Soomaaliyeed.
Madaxweyne Geelle ayaa intaasi ku daray in Jabuuti ay ka qeyb qaadaneyso xalinta xiisadda siyaasadeed ee haatan u dhexeysa labada dhinac.
“Fadhigii Soomaaliya waan ka qeybgalnay, waana ku caddeenay halkaa, sida arrinku dhanka wanaagga ugu socdo, dhanka soo kabista ugu socod annaga kama harin kama aanu hareyno, maxaa yeelay garab buu innaga inoo yahay” ayuu yiri madaxweynuhu.
Ugu dambeyn waxa uu ugu baaqay madaxda dowladda federaalka iyo kuwa dowlad goboleedka Jubbaland inay muujiyaan isu tanaasul, una turaan danta guud ee dalka.
Khilaafkan oo ka dhashay doorashadii dib loogu doortay, Axmed Madoobe ayaa sii xoogeystay, kadib markii ay dowladdu xayiraad ku soo rogtay duulimaadyada Kismaayo.
Caasimada Online
Xafiiska Muqdisho
caasimada@live.com
