Muqdisho (Caasimada Online)-Ergayga gaarka ah ee QM u qaabilsan arrimaha Somalia Michael Keating, ayaa ka hadlay wada shaqeynta ay la sameyn doonaan Dowlada uu Hogaaminaayo Madaxweynaha Somalia Maxamed C/llahi Farmaajo iyo Ra’isul wasaaraha Xukuumada Somalia Xasan Kheyre.
Michael Keating, ayaa sheegay in dhammaan Xubnaha Beesha Caalamka ka jooga Somalia ay isku waafaqeen in si hufan loola shaqeeyo Dowlada Somalia waxa uuna cadeeyay in wada shaqeynta la filaayo ay noqon doonto mid ka duwan kuwii hore.
Michael Keating, waxa uu tilmaamay in Beesha Caalamka ay ka go’an tahay samata bixinta Somalia, waxa uuna amaanay sida Madaxweynaha Somalia uu durba u bilaabay howlaha Qaran ee DFS.
”Waxaan laba jibaari doonaa howlihii aan u joognay Somalia waxaa naga go’an inaan dhameystirno dhammaan howlaha qabyada noo ah si meesha looga saaro qabyada muuqata ee dhameystirka u baahan”
Michael Keating, ayaa cod dheer ku sheegay inay diyaar u yihiin in Madaxweynaha iyo Ra’isul wasaaraha kala shaqeeyan sida lagu kobcin lahaa Siyaasada Xukuumada iyo dhammaan howlwadeenada Qaranka.
”Dowlada waxaan ka caawin doonaa dhan waliba si loo helo Siyaasad isku dheela tirsan oo ay ku shaqeyso Dowlada Cusub maadaama looga baahan yahay inay sii wado howlihii ay qabyeysay Dowladii hore”
Geesta kale, Michael Keating, ayaa ballanqaaday in Beesha Caalamka ay muujin doonto wada shaqeynta ay la leedaha Dowlada Somalia ee uu Hogaaminaayo Maxamed C/llahi Farmaajo.
Caasimada Online
Xafiiska Muqdisho