Muqdisho (Caasimada Online)-Ra’isul wasaaraha Xukuumada Somalia Xasan Kheyre ayaa ka hadlay dhibaatooyinka Ciidamada Qaranka ku heysta furumaha dagaalka.
Ra’isul wasaaraha ayaa sheegay in Ciidamada Qaranka ay heystaan dhibaatooyin farabadan oo aan lagu soo koobi karin hadal, waxa uuna tilmaamay inuu diyaar u yahay in Qaranimada Somalia uu u huro naftiisa.
Waxa uu Ra’isul wasaaraha sheegay inuu booqan doono dhammaan furumaha dagaalka si uu usoo dariso dhibaatada heysata Ciidamada Qaranka.
Wuxuu cadeeyay in Xukuumadu ay kaalinta koowaad siin doonto Ciidamada Qaranka iyo Shacabka Soomaaliyeed, waxa uuna ballanqaaday inuu socod ku mari doono dhammaan furumaha dagaalka oo ay ku sugan yihiin Ciidamada dalka.
Ra’isul wasaaraha ayaa sidoo kale sheegay in xukuumadda Soomaaliya gaar ahaan Wasiirada ay diyar u yihiin in ay taageeraan Ciidanka Xoogga dalka Soomaaliyeed, si ay u helaan niyad wanaag.
Ra’isul wasaaruhu ma uusan sheegin xiliga iyo ayaanka uu booqan doono furumaha dagaalka balse waxa uu cadeeyay inuu gaari doono dhammaan furumaha Ciidamada.
”Ma doonaayo in leygaga sheekeeyo xaalada ay ku noolyihiin Ciidamada ku sugan furumaha dagaalka waxaan doonayaa inaan indhaheyga kusoo arko sida ay xaaladu tahay waayo waxaa iga go’an inaan dhibta la wadaago Ciidamada duurka ugu jir difaaca dalka iyo dadka aawgood”
Haddalka Ra’isul wasaare Kheyre ayaa kusoo aadaya xili dhawaan ay DFS ballanqaaday in mudnaanta koowaad ay siin doonaan Ciidamada.
Caasimada Online
Xafiiska Muqdisho
[email protected]