Madaxweynaha Soomaaliya Maxamed Cabdullaahi Farmaajo oo shalay ka hadlayey magaalada Cadaado ayaa sheegay in khilaaf la’aanta iyo xasiloonida Djibouti ay keentay in uu furo dekad ay ku baxday 400 Milyan oo dollar oo ah dekadda 4 jeer ka weyn dekadda Muqdisho.
Hadalka Farmaajo ayaa u muuqaday inuu ka masayray horumarka Jabuuti, hase yeeshee wax wax wanaagsan marka hoggaamiye uu ka masayro horumarka dalalka kale.
Hoggaamiyaha wanaagsan waxaa lagu gartaa in dhibaatooyinka dalalka kale ay u noqdaan digniini, islamarkaana horumarkooda uu ka dhigto dhiir-gelin uu ku daydo, kuna hamiyo inuu sidaas oo kale gaaro.
Hadalkaii Farmaajo ee shalay, ma ahayn inuu ka xun yahay horumarka Jabuuti, hase yeeshee inuu dareemayo inuu jeclaan lahaa in Soomaaliya ay sidaas oo kale ama kasii wanaagsan ay noqoto.
Wuxuu isku barbardhigayey inay tahay wax aan la qaadan karin in Muqdisho oo laba mar ka dad badan guud ahaan dadka dalka Jabuuti, haddana in Jabuuti ay haystao deked afar mar ka weyn dekedda Muqdisho.
Marka sidaas qalbigiis ay ku taagan tahay waxaa durba kuu sawirmaya shaqsi ay ka go’an tahay wax qabad, jecelna inuu gaaro horumarka kuwa kale ay ku tallaabsadeen.
Inkasta oo Soomaaliya ay haystaan caqabado badan, haddana waxaa shaki ku jirin inay haysato hoggaamiye wanaagsan oo haddii shacabkiisa iyo madaxda kale la shaqeeyaan dalka gaarsiin kara horurmar wanaagsan.
Soomaaliya waxay ay haysataa fursad wanaagsan, oo haddii laga faa’iideysto aysan mar dambe dib u noqon doonin.
Madaxweyne Farmaajo, inkasta oo bani aadam yahay, haddana dhaliilahiisa yeelan karo, waxaa marnaba shaki ku jirin jaceylka dalkiisa uu u qabo iyo wadaniyadda ku jirta.
Labadaas arrinba waxay mar walba muhiim u yahay astaamaha hogaamiyaha wanaagsan, waana kuwa muujinaya hogaamiye ka maran musuq-maasuq iyo eex.
Hadalkii shalay Farmaajo ka sheegay Cadaado waxa uu I geliyey rajo ka badan tii aan marka hore ka qabay, waxaana ii muuqata sababtii Soomaalida ay ku jeclaadeen.
Waxaa walaalahayga Soomaaliyeed ugu baaqayaa in dowladooda garab istaagaan, oo ay ka faa’iideystaan fursadda Soomaaliya maanta ay haysato.
W/Q: Aadan Axmed Guuleed
Muqdisho, Soomaaliya
Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada [email protected] Mahadsanid