Cadaado (Casimada Online)-Waxaa magaalada Cadaado ee xarunta maamulka Galmudug ka dhacay munaasabada caleemasaarka Hogaamiyaha maamulka Galmudug Axmed Geelle Xaaf.
Caleemasaarka waxaa ka qeyb galay Madaxweynaha DFS, Wasiiro, Xildhibaano, Hogaamiyayaasha maamulada Koofur Galbeed, Jubbaland, Puntland, Saraakiil ciidan iyo Wakiilo ka socda Beesha Caalamka.
Caleemasaarka Hogaamiyaha Galmudug Axmed Geelle Xaaf ayaa waxaa ka hadlay Safiirro ka socda beesha caalamka sida Ambassador Madiira, Michel Keatin, Safiirka Itoobiya iyo Safiirka Djibouti.
Hadalka ayaa waxaa ku horeeyay Ambassador Madiira oo ka socday midowga Afrika waxa uuna u hambalyeeyay Hogaamiyaha cusub ee Galmudug Axmed Geelle Xaaf.
Ambassador Madiira, ayaa inta uu ku guda jiray hadalkiisa sheegay inuu ballanqaadayo wada shaqeyn dhaw, isaga oo hadalkiisa ku soo afjaray ”Si wada jir ah ayaa soo celin karnaa midnimnada iyo xasiloonida Somalia”.
Ambassador Madiira, waxa uu shakiga ka saaray in ciidamada AMISOM ay dayici doonaan fursad, haddii ay dhacdo in looga baahdo ka howlgalka magaalada Cadaado.
Michel Keating, Waxaa sidoo kale, Caleemasaarka ka hadlay Ambassador Michel Keating oo ah ergeyga QM ee Somalia, waxa uuna sheegay in Beesha Caalamka ay si dhow ula shaqeyn doonto Hogaamiye Xaaf.
Nuqul kamid ah hadalka Michel Keating ayaa ahaa ”Galmudug waa meel weyn, ariga ugu fiican adduunka halkan ayaa laga helaa, waxaa kale oo la ii sheegay in mustaqbalka laga heli karo Muus”
Jamaaludiin Mustafa oo ah safiirka Ethiopia u fadhiya Somalia waxa uu u hambalyeeyay Hogaamiyaha cusub ee Galmudug Axmed Geelle Xaaf.
Jamaaludiin, waxa uu xusuusiyay sida dhinacyada looga jiro Beri Ahlu Sunna, waqooyi Puntland, Koofur dowladda federal ah iyo galbeedka oo Itoobiya ah, waxaa uu ballan-qaaday in uu la shaqeyn doono.
Safiirka Djibouti oo goobta ka hadlay waxaa uu sheegay in salaam uga sido madaxweynaha Djibuti Ismaaciil Cumar Geelle, waxaa isna dhankooda ballan-qaaday wada shaqeyn.
Docda kale, Hogaamiyaha cusub ee maamulka Galmudug Axmed Ducaale Geelle Xaaf ayaa sheegay in uu ka shaqeyn doono midnimada Shacabka Galmudug iyo Nabadeynta degaanadaasi.
Caasimada Online
Xafiiska Cadaado