Muqdisho (Caasimada Online) Qaar ka mid ah xildhibaanno horrey u taageersanaa mooshinka raysal wasaaraha ayaa maanta ka laabtay go’aankooda iyagoona tilmaamay in mooshinka uu yahay mid qalad ah.
Xildhibaannada hadlay waxa ay muujiyeen in mooshinka hor yaalla baarlamaanka uu yahay mid uu ka dhexeeyo madaxweynaha iyo raysal wasaaraha.
Dhinaca kale, waxaa guddoomiyaha golaha baarlamaanka oo shir guddoominaya fadhigga uu sheegay in maanta la soo afjari doono dodda mooshinka dabadeedna loo dhaqaaqi doono siddii cod loogu qaadi lahaa mooshinka.
Ilaa hadda xildhibaannada ka hadlay madasha maanta waxa ay u badan yihiin kuwa ka soo horjeeda mooshinka.
Si dhab ah looma oga wax yaabaha ka soo baxyaa kulanka maanta, waxaana wariyaasha ay sheegayaan in fadhigga ay ku sugan yihiin xubno ka socda xafiisyada ra’iisal wasaaraha iyo kan madaxweynaha.
Si kastaba, xitaa in kasta oo ay qaar ka laabteen mooshinka, haddana waxaa loo badinayaa in Saacid aanu heli doonin codka kalsoonida, maadaama ay diidan yihiin in ku dhow saddex meelood laba meel xildhibaanada baarlamanka.
Wixii ku soo kordha la soco Shabakadda Caasimada Online, oo wariyaal badan loo oggolaaday in ay uga soo warramaan fadhigga.