Muqdisho (Caasimada Online) Ra’iisal wasaaraha Soomaaliya Cabdi Faarax Shirdoon (Saacid) ayaa ku gacan seyray eedaha uga yimid mudanayaasha baarlamaanka ee ku aadan in xukuumadiisa ay ku fashilantay wax yaabaha loo idmay.
War-qoraal ah oo ka soo baxay xafiiska raysal wasaaraha, oo nuqul ka mid ah la soo gaarsiiyay Shabakadda Caasimada Online, ayaa lagu sheegay mooshinka hor yaalla baarlamaanka in uu yahay mid aan xaqiiqo ahayn oo aan loo heynin wax cad ah.
“Eedaymaha mooshinka ku xusan ee lagu dhudhuminayo kalsoonida xukuumadda, ma aha kuwo xaqiiqda dhabtaa ku salaysan. Waxaa maqan xog-ogaalnimo rasmi ah. haddaba, si waafaqsan cadaaladda dabiicigaa (Natural Justice) iyo shuruucda dalkaba ” ayuu yiri raysal wasaaraha.
Wuu sii hadlay “Waxaa xukuumaddu diyaarisay qoraal waafi ah ee ay uga jawaabayso dhamaan eedaymaha loo soo jeediyay, oo keeni kara qaneecaad iyo kalsooni dhisid buuxda. Sidaas la’adligeed, ‘xukuumad ahaan’, waxaan golaha baarlamaanka ee sharafta leh mar labaad ka codsanaynaa in naloo ogolaado fursad nalagu dhagaysto si aan isaga difaacno eedaymaha naloo soo jeediyay. Go’aan kasta oo la gaaro anagoo maqan waa mid ku dhisan malo awaal.” ayuu markale yiri raysal wasaaaraha.
Raysal wasaaraha ayaa sidoo kale baarlamaanka weydiistay in la siiyo fursad ay xukuumaddu isku difaacdo, wuxuuna intaas ku daray in go’aan kasta oo baarlamaanka ka soo baxa iyadoo xukuumaddu ka maqan tahay uu yahay mid mala awaal ah.
Hadalka raysul wasaaraha ayaa ku soo beegmay iyadoo ay magaalada Muqdisho uu maalintii labaad ka socdo mooshinka ka dhanka ah raysal wasaaraha, iyadoo maanta xildhibaannadu ay diideen in raysul wasaaraha uu fadhiga ka soo qeyb-galo si uu isku difaaco.
Ma cadda sida ay wax noqon karaan, waxaana dadka ku dhaqan Muqdisho ay indhaha ku hayaan halka uu ku dambeyn doono mooshinka laga keenay raysal wasaaraha.
Caasimada Online
Xafiiska Wararka Muqdisho