Muqdisho (Caasimada Online) – Saraakiisha Hay’adaha Ammaanka iyo Maamulka Gobolka Banaadir ayaa caawa hoygiisa ugu tegay kulan xasaasi ahna lasoo yeeshay Taliyaha cusub ee NISA Mahad Salaad.
Taliyaha Ciidanka Booliska, Jeneraal Asad Cabdullahi Cismaan, Guddoomiyaha Gobolka Banaadir, Dr. Xasan Xuseen Mungaab, Guddoomiye ku-xigeenka Amniga Gobolka Banaadir, Taliyeyaasha qeybaha Booliska iyo NISA ee Gobolka Banaadir, iyo Taliyaha Ciidanka Boolis Militaaro ayaa caawa hooygiisa ugu tegay Agaasimaha cusub ee Hay’adda NISA, Mahad Maxamed Salaad.
Saraakiisha iyo masuuliyiinta ayaa isku hambalyeyn kadib shir ku saabsan amniga ku galay guriga Mahad Salaad, waxayna diiradda saareen sida loo sugayo amniga caasimadda maalmaha barakaysan ee Ciidda.
Saraakiisha ayaa isla qaatay muhiimada ay leedahay sugidda nabadgelyada maalmahaan farxadda badan, iyagoo adkeeyay baahida loo qabo in la laba jibaaro dadaallada amniga, si shacabka Soomaaliyeed ay ugu ciidaan xasillooni iyo nabadgelyo.
Ugu dambeyn, saraakiisha ayaa ugu baaqay shacabka Soomaaliyeed inay la shaqeeyaan ciidamada ammaanka ee u taagan sidii farxad iyo nabad ugu ciidi lahaayeen.
Guddoomiyaha cusub ee gobolka Banaadir ayaa xalay xilka la wareegay, halka Agaasime Mahad Salaad uusan weli la wareegin xilka.
