London (Caasimada Online) – Yacquub Axmed, waa wiil Soomaali ah oo dowladda Ingiriiska ay tarxiilkiisa kaga baxday lacag ka badan hal milyan oo dollar.
Kiis dacwadeedkan oo muddo badan socday ayaa waxaa ka taagnayd doodda dhanka sharcig ah oo ka socotay dalkaasi, taasi oo ugu dambeyntiina kusoo dhamaatay musaafurinta Yacquub.
Yacquub ayaa waxaa muddo dheer ku socotay dacwad la xiriirta kufsi, taasi oo ay ku wehliyeen saddex qof oo kale. Kiiskan ayaa ka dhacay dhisme ku yaal London, halkaasi oo kufsiga loogu geystay gabadh yar oo lix iyo toban jir ah, oo la qiyaamay, qiyaastii 15 sano kahor.
Marxaladaha uu soo maray kiiska iyo tarxiilka ka dhashay ee Yacquub, ayaa waxa uu caro xooggan ka dhaliyay gudaha dalkaasi, ayada oo warbaahinta Ingiriiska ay si adag uga hadashay kiiskaan.
Yacquub ayaa ugu dambeyn laga tarxiilay Ingiriiska bishii hore, kadib sanado uu baaqday, iyada oo ay ku baxday dhaqaale badan oo caro dhaliyay, tan iyo intii uu socday kiiska.
Ku dhawaad hal milyan oo lacagta Giniga Ingiriiska, oo ah in ka badan hal milyan dollar ayaa ku baxday muddada ay socotay dhageysiga heerarka kala duwan ee dacwaddaan.
Lacagtaan ayaa iskugu jirta mid la siiyay qareennada difaacayay Yacquub, mid lagu kireeyay diyaaraddii lagu masaafuriyay iyo kharash kale oo laga bixinayay sida; hoyga iyo adeegyo kale afar iyo tobanka toddobaad ee ugu horeysa marka lagu soo cesho dalka.
Dadweynaha Ingiriiska oo arrintaan si weyn uga carooday ayaa sheegay in lacagtaan tahay mid aad u badan oo aysan mudnayn in canshuurta laga qaado la siiyo dad dalkooda danbi ka galay.
Si kastaba, kiiska dacwada Yacquub ayaa banaanka keenaya hababka cakiran iyo hanaanka sharciga ee masaafurinta ee dalka Ingiriiska, taasi oo mararka qaar ay ku baxdo lacag aad u badan.
