Muqdisho (Caasimada Online) – Warar lagu kalsoon yahay ayaa sheegaya in Madaxweynaha Somalia Maxamed C/llahi Farmaajo uu dib uga laabtay qorshihii ahaa in Golaha Wasiirada aan lagu soo darin Xildhibaanada ka tirsan labada Aqal ee BFS.
Madaxweynaha ayaa la sheegay inuu aqbalay go’aanka Golaha Wasiirada loogu biirinaayo Xildhibaanada Baarlamaanka kadib markii ay gadoodeen Xildhibaanadii codka siiyay.
Golaha Wasiirada ayaa la xaqiijiyay inay kamid noqon doonaan ilaa 6 Xildhibaan oo laga soo kala qaadan doono labada Aqal ee Baarlamaanka Somalia kuwaa oo loo aqoonsaday inay buuxin karaan Sifaha lagu soo xulaayo Golaha Wasiirada Xukuumada Somalia.
Madaxweynaha iyo Ra’isul wasaaraha ayaa horay u go’aamiyay in Xildhibaanada labada Aqal ay ka soomi doonaan kamid noqoshada Golaha Wasiirada, inkastoo sababo jira darteed tirro Xildhibaano ah ay uga mid noqon doonaan Golaha Wasiirada.
Xildhibaanada kamid noqon doona Golaha Wasiirada ayaa sidoo kale la xaqiijiyay in Dowladihii hore ay kasoo qabteen xilal kala duwan kuwaa oo ay ku jiraan Xildhibaano horay usoo galay Musuq Hanti Qaran mudadii ay hayeen Xilka Wasiirnimo iyo ku-xigeen.
Madaxweynaha Somalia Maxamed C/llahi Farmaajo oo isagu xiligaani leh awooda ugu badan ee lagu soo magacaabaayo Golaha ayaa la kulmaaya cadaadis kaga imaanaya dhanka Xildhibaanada iyo Odayaasha dhaqanka ee dib loogu laabto gar goynta.
Si kastaba ha ahaatee, waxaan la saadaalinkarin isbedelka ku imaankara Go’aanka Madaxweynaha ee lagu kordhinaayo Xildhibaanada kamid noqon doona Golaha Wasiirada.
Caasimada Online
Xafiiska Muqdisho
[email protected]