Garoowe (Caasimada Online) Mas’uuliyiinta Puntaland ayaa aaminsan in ku dhawaad 300 oo qof ay ku dhinteen dabeylo iyo roobab xooggan oo shantii maalmood ee la soo dhaafay ka da’yay deeganno badan oo ku yaalla Xeebaha Bari ee Soomaaliya.
Sidoo kale waxaa ay masiibooyinkaas ay meerteen xoolo badan oo u badan Geel iyo Ari sida ay lee yihiin dadka deeganka.
Madaxweynaha Puntland Cabdiraxmaan Faroole ayaa ku dhawaaqay xaalad degdeg ah, wuxuuna sheegay in meelaha ugu sii daran ay yihiin deegannada Dan-gorayo, Beyra iyo Eyl.
Waxaa lagu soo warramayaa oo kale in gurmad la gaarsiiyay dadka ay wax yeelada ka soo gaartay roobabka iyo dabeylaha ka socday deegannadaas, in kasto uu yer yahay gurmadka tegay halkaas waayo jidadkii ay go’an isgaarsiin ma jirto.
Dowladda Soomaaliya ayaa dhibaatadaas ku tilmaamtay masiibo qaran waxaana ay ku deeqday Hal Milyan oo dollaar, iyadoona baaqyo u dirtay Soomaalida dibedda iyo beesha caalamka.
Dhinaca kale, Wariyaha Caasimada Online ee Puntaland ayaa soo sheegaya in masiijada waaweyn ee ku yaalla Puntland laga billaabay deeqo loo aruurinaayo dadka ay wax yeelada ka soo gaareen dabeylahaas iyo roobabka xooggan ee ka socday deegannada xeebaha.
Caasimada Online
Xafiiska Wararka Garoowe