Boosaaso (Caasimada Online) – Hogaamiyaha maamulka Puntland C/wali Gaas ayaa si cad u sheegay in Puntland ay garaneyso waxa Maslaxada ugu jira iyo wixii aan maslaxad u aheyn waxa uuna ka digay in la Siyaasadeeyo qorshaha lagu taabagalinaayo Dekadda Boosaaso.
Waxa uu sheegay C/wali Gaas in Maamulka Puntland uusan iibin Dekadda Boosaaso, balse dayactirka iyo Horumarinta Dekadda ay la kaashanayaan Dowlada Imaaraadka oo weli uu u socdo heshiiska lagu taabagalin lahaa Dekadda.
Waxa uu tilmaamay in Puntland ay dhibaato kala duwan ku qabto Dekadda Boosaaso waxa uuna tusaale usoo qaatay in Maraakiibta waaweyn ay dhibaatooyin kala duwan kala kulmaan xirashada iyo in Maraakiibta ay ku adagtahay inay dajiyaan rarka ay wadaan.
Heshiiska ay la galeen Imaaraadka ayuu sheegay inuu yahay mid KMG ah isla markaana uu socon doono muddo gaaban si Puntland ay ula wareegto Dekadda oo dhinac waliba ka dhameystiran.
Wuxuu sheegay in dowladda Imaraadku ay Puntland ka caawinayso ballaarinta iyo dhismaha Dekeda Bosaso oo ah dekeda yar oo 30 sanno ka hor la dhisay, taasi oo uu sheegay in balaarinteedu ay ka qaybqaadan doonto horumarka iyo koboca dhaqaale ee Puntland.
”Dowlada Imaaraadka waa Dowlad aanu walaalo nahay waxa ay nala jecleysteen dhismaha iyo taabagalinta Dekadad Boosaaso, Puntland iyaduna wey soo dhaweysay waayo muddo farabadan ayaan dhib ku qabnay Dekadda”
Haddalka C/wali Gaas ayaa u muuqanaaya mid lagu difaacaayo Heshiiska qarsoodiga ah oo ay la galeen Dowlada Imaaraadka oo Siyaasad ahaan qorsheyneysa inay gacanta ku dhigto dhammaan Kaabayaasha dhaqaale ee dalka.
Caasimada Online
Xafiiska Muqdisho
[email protected]