Baydhabo (Caasimada Online) – Baarlamaanka Dowlad-goboleedka Koonfur Galbeed ayaa maanta yeeshay guddoon cusub kadib doorasho ka dhacday magaalada Baydhabo ee xarunta ku-meelgaarka ah ee maamulkaas.
Doorashada ayaa lagu doortay Guddoomiyaha Golaha Wakiillada Baarlamaanka 3-aad ee Koonfur Galbeed Dr. Mahad Maxamed Sheekh Xasan, halka Guddoomiye Ku-xigeenka 1-aad loo doortay Aadan Xasan Usaama. Sidoo kale, Shamso Maxamed Yarow ayaa loo doortay Guddoomiye Ku-xigeenka 2-aad ee baarlamaanka.
Xildhibaannada cusub ee hoggaanka baarlamaanka ayaa lagu doortay cod ay dhiibteen xubnaha Golaha Wakiillada, kuwaas oo maalmahanba ku howlanaa dhameystirka hannaanka doorashooyinka hay’adaha maamulka Koonfur Galbeed.
Doorashadan ayaa timid kadib markii la soo dhisay Baarlamaanka 3-aad ee Koonfur Galbeed, kaas oo ku yimid hannaanka doorashooyinka qof iyo cod. Hannaankan ayaa ahaa mid ay si weyn uga horyimaadeen siyaasiyiinta mucaaradka ah iyo maamullada Puntland iyo Jubaland.
Waxaa hadda la filayaa in baarlamaanka cusub uu guda galo wajiga xiga ee doorashada maamulka, iyadoo la qorsheynayo in 10-ka bishan Juun la doorto Madaxweynaha Dowlad-goboleedka Koonfur Galbeed Soomaaliya.
Doorashadan ayaa qeyb ka ah geeddi-socodka dhismaha hay’adaha dowlad-goboleedka, iyadoo lagu soo xulay hoggaanka cusub ee Golaha Wakiillada.
Dhanka kale, Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa si degdeg ah u hambalyeeyay guddoomiyaha cusub ee Golaha Wakiillada Koonfur Galbeed, Dr. Mahad Maxamed Sheekh Xasan, Guddoomiye Ku-xigeenka 1-aad Aadan Xasan Maxamed (Usaama), iyo Guddoomiye Ku-xigeenka 2-aad Marwo Shamso Maxamed Yarow.
Madaxweyne Xasan Sheekh ayaa mas’uuliyiinta cusub kula dardaarmay inay si hufan, daacadnimo leh, uguna adeegaan shacabka waajibaadka culus ee loo igmaday. Wuxuu sidoo kale ku boorriyay inay door muuqda ka qaataan xoojinta dowladnimada, horumarinta nidaamka dimuqraadiyadda iyo adkeynta hay’adaha dowladeed.
Sidoo kale, Madaxweynaha ayaa bogaadiyay hannaankii nabdoonaa ee ay ku qabsoontay doorashadu, isaga oo ku ammaanay xildhibaannada Baarlamaanka Koonfur Galbeed gudashada waajibaadkooda dastuuriga ah iyo kaalinta ay ka qaateen xasilloonida iyo dhismaha hay’adaha maamulka Koonfur Galbeed.
