Muqdisho (Caasimada Online) – Wararka aan ka heleyno ilo ku dhow dhow Ra’isul wasaarihii hore ee Somalia Cumar C/rashiid Cali ayaa sheegaya in Sharmaarke uu dib ula midoobi doono qoyskiisa oo muddo dheer ay kala mashquulen.
Cumar C/rashiid Ra’isul wasaarihii hore ee Somalia ayaa la sheegay inuu nasiin u aadi doono dalka Mareykanka oo ay ku dhaqan yihiin qoyskiisa si uu muddo kooban uga nasto Siyaasada Jahwareerka leh ee uu ku dhex jiray dhowrkii sano ee ugu danbeysay.
Cumar C/rashiid ayaa labadii sano ee ugu danbeysay ku dhex jiray Siyaasada Somalia waxaana xusid mudan inuu hayay howlaha ugu badan ee Qaranka, taa oo ku abuurtay nasiin la’aan ka dhalatay Siyaasada jahwareerka laheyd ee u dhexeysay Dowlada, Beelaha, Siyaasiyiinta iyo Dowladaha saaxiibada la’ahaa Somalia.
Cumar C/rashiid oo ka tirsan Xildhibaanada Aqalka Sare ee baarlamaanka ayaa deegaan ku noqon doona Magaalada Muqdisho maadaama uu qeyb ka yahay Xildhibaanada dalka, waxa uuna nasiino ka dib kusoo laaban doonaa Magaalada Muqdisho.
Dhawaan ayaa waxaa dalka Turkiga nasiino u gaaray Madaxweynihii hore ee Somalia Xasan Sheekh Maxamuud oo isna 4 sano ee lasoo dhaafay saaxiib u noqday nasiino la’aan kaga imaaday dhanka Siyaasada.
Dhinaca kale, Xasan ayaa iminka dib ula midoobay qoyskiisa ku sugan dalka Turkiga, waxaana la filayaa in Cumar C/rashiid uu isna galo Jawi nasiino leh.
Caasimada Online
Xafiiska Muqdisho
[email protected]