Muqdisho (Caasimada Online) – Madaxweynaha Somalia Maxamed C/llahi Farmaajo iyo Ra’isul wasaaraha dalka Xasan Kheyre ayaa ku guda jira xil ka qaadista iyo magacaabida xubnihii hore ee la soo shaqeeyay dowladii Xasan Sheekh Maxamuud.
Xilalka ugu badan ayaa waxaa laga qaaday mas’uuliyiin dhowr ah oo ku dhow dhowaa Madaxweynihii hore ee Somalia Xasan Sheekh.
Madaxweynaha dalka iyo Ra’isul wasaaraha ayaa ilaa iyo hadda waxa ay xilka ka qaaden inkabadan 32 mas’uul oo u badan Agaasimayaal, Qunsuliyado iyo Taliyayaal ciidan.
Labada mas’uul ee ugu sareysa dalka ayaa waxa ay sidoo kale ku guda jiraan xil ka qaadista iyo magacaabida waxana lagu wadaa inay saameyso Safiiro dhowr ah, kuwaa oo lagu bedeli doono mas’uuliyiin kale.
Shaqsiyaadka la magacaabay ayaa u badan xulafada Madaxweynaha iyo Ra’isul wasaaraha waxaana xusid mudan in kuwa iminka miiska saaran ay yihiin kuwo ku dhow dhow Madaxweynaha oo u badan qurba joog.
Ilo ku dhow dhow Madaxweynaha ayaa sheegay inuu socdo qorsho xilalka looga qaadayo inkabadan 11 mas’uul oo liiskooda ku diyaarsan Xafiiska Madxaweynaha.
Mas’uuliyiinta xil ka qaadista lala damacsan yahay ayaa waxaa ku jira Xeer ilaaliyaha Qaran, ku-xigeenadiisa iyo mas’uuliyiin kale oo ka tirsan Hay’adaha Garsoorka Qaranka oo horay looga gudbiyay cabashooyin badan.
Si kastaba ha ahaatee, Madaxweynaha ayaa ku guda jira xil ka qaadista iyo magacaabida, waxa uuna qorshuhu yahay in dowlada ay noqoto mid xubnaheeda ay cusub yihiin.
Caasimada Online
Xafiiska Muqdisho
[email protected]