Muqdisho (Caasimada Online) – Golaha Wasiirada ee Xukuumada Federaalka Soomaaliya ayaa maanta isugu yimid kulan khaas ah oo ay uga wada hadlayeen arrimo dhowr ah.
Kulanka ayaa waxaa shir guddoominayay Ra’isal wasaare ku-xigeenka Xukuumada Mahdi Maxamed Guuleed ”Khadar”, waxaana ka mid ahaa qodobada looga hadlay kulanka dardargelinta Hindise Sharciyeedyada muhiimka u ah howlaha Dowlada.
Ra’isul wasaare ku-xigeenka ayaa sheegay inay muhiim tahay in la dardar galiyo dhammaan sharciyada dalka, waxa uuna sheegay in fulinta iyo dardar galinta ugu badan ay tahay mid dusha ka saaran Wasiirada.
Khadar, ayaa sheegay in hirgalinta sharciyada dalka ay yihiin kuwo hirgalinteeda looga fadhiyo Golaha Wasiirada waxa uuna ku baaqay in wax waliba sidii loogu talo galay loo sameeyo.
Golaha ayaa dhageystay warbixino ku aadan shuruucda ay gacanta ku hayaan Wasaaradaha qaar si loogu sii diyaar garoobo oo Golaha Wasiirada ay u ansixiyaan ka hor inta aan loo gudbin Baarlamaanka.
Wasiirada ayaa sheegay in shuruucda ay diyaariyeen, qaarna ay weli wadaan wadatashi, iyadoo la isku raacay in shuruuc ka badan 20 ay diyaar yihiin.
HOOS KA AKHRISO HINDISE SHARCIYEEDYADA
1- Isgaarsiinta
2- La-dagaalanka Musuq-maasuqa
3- La-dagaalanka Argagaxisada
4- Runta & Dib u Heshiisiinta
5- Dowladaha Hoose
6- Dambiyada Kufsiga
7- Muwaadinimada
8- Dadka Baahiyaha Gaarka qaba
9- Kalluumeysiga & Kheyraadka Bada
10- Badda
11- Kheyraadka Biyaha
12- Tamarta
13- Maareynta Maaliyada
14- Istaatiistikada
15- Xeerka Saxaafada
16- Waxbarashada
17- Nidaamka Hay’adaha Samafalka
18- Sharciga Beeraha
19- Gudiga Muftida Culumada
Shuruucda ay iminka gacanta ku hayaan Wasaaradaha qaar, ayaa si wada jira ay u meel marin doonaan Wasiirada, waxaana intaa kadib la marin doonaa Golaha Shacabka BFS.
