Muqdisho (Caasimada Online) – Waxaa magaalada Muqdisho weli ka socda ololo ay wadaan beelaha Soomaaliyeed ee xil doonka ah kuwaa oo kala xulanaaya Kuraasta muhiimka ah.
Loolanka ugu badan ayaa waxa uu ka dhex socdaa xarunta Villa Somalia ee magaalada Muqdisho, halkaa oo ay ku qulqulayaan mas’uuliyiin iyo odayaal dhaqmeed baadi-goob ugu jira xilalka aan weli la magacaabin ee ugu muhiimsan.
Beelaha baadi-goobka ugu badan wada ayaa waxaa kamid ah Beesha Sacad oo ka tirsan beel weynta Habar-Gidir oo kamid ah beelaha aan kuraas aan ku filneyn ka helin dowladda.
Beeshani ayaa dadaal weyn ugu jirta sidii loogu magacaabi lahaa Guddoomiyaha Maxkamada darajada koowaad ee ciidamada Qalabka Sida ama Hanti dhowraha Guud ee Qaranka.
Mas’uuliyiin ka tirsan Beesha Sacad oo ka gadoodsan xil la’aanta ayaa dhawaan kulan la qaatay Madaxweynaha iyo Ra’isul wasaaraha oo ay kala hadleen helida xilal hor leh oo ay ka helaan DFS.
Farmaajo iyo Kheyre ayaa Beesha u balanqaaday inay heli doonaan wixii ay xuquuq u leeyihiin oo dhanka Siyaasada ah.
Labada mas’uul iyo mas’uuliyiinta Beesha ayaa ku balamay in laga jawaabayo dalabka, isla markaana lasiin doono labada xil midkood.
Si kastaba ha ahaatee, Madaxweynaha iyo Ra’isul wasaaraha ayaa ku guda jira maalmaha xil magacaabida, waxaana la saadaalinayaa in beeshaani ay kamid noqon doonto beelaha kale ee xilalka heli doona.
Caasimada Online
Xafiiska Muqdisho
[email protected]