Muqdisho (Caasimada Online) – Warar lagu kalsoon yahay ayaa sheegaya in Hogaamiyaha maamulka Jubbaland Axmed Madoobe uu ka biya diiday amar uu dhawaan siiyay Madaxweynaha dalka Maxamed C/llahi Farmaajo.
Wararka aan heleyno ayaa tibaaxaya in Hogaamiyaha maamulka lagu amray in maamulka Dekadda iyo Garoonka Kismaayo uu hoosgeeyo wasaradaha dowladda oo ay khuseeyan.
Madaxweynaha ayaa Hogaamiyaha faray in iyadoo la ilaalinaayo nidaamka dowladnimo maamulada Dekadda iyo Garoonka si toosa loo hoosgeeyo dowlada Federaalka, gaar ahaan Wasaaradaha ay khuseeyan maamulida Garoomada iyo Dekadaha dalka.
Xogaha aan heleyno ayaa intaa kusii daraaya in Hogaamiyaha maamulka Jubbaland Axmed Madoobe uu qaadacay amarkaasi, waxa uuna dhanka kale ku andacooday in wareejinta maamulada Dekadda iyo Garoonka Kismaayo ay imaaneyso goortii dalka ay ka curato dowlad fadhisa oo hanakarta maamulka.
Madoobe waxa uu sheegay in maamulkiisa uu juhdi badan ku bixiyay hagaajinta Dekadda iyo Garoonka Kismaayo, waxa uuna sidoo kale xujo ka dhigay in wareejinta ay ugu dhow dahay inay imaado goortii maamulada kale laga soo wareejiyo Dekadaha iyo Garoomada ku jira gacantooda.
Madaxweynaha Somalia Maxamed C/llahi Farmaajo ayaa horay u sheegay in dowladiisa ay qorsheyneyso inay soo celiso dhammaan Dekadaha, Garoomada, Warshadaha iyo Kaabayaasha dhaqaale ee uu leeyahay dalka.
Talaaadaani ayaa imaaneysa xili Dekadda iyo Garoonka magaalada Kismaayo ay maamulaan Ciidamada AMISOM, gaar ahaan kuwa Kenya iyo Ethiopia.
Caasimada Online
Xafiiska Muqdisho
[email protected]