Garowe (Caasimada Online)-Waxaa la aaday Wareega ugu dambeeya ee doorashada madaxweynaha Maamulka Puntland, waxaana hadda isku soo haray kaliya labo musharax oo ka haray 19 musharax kale oo rajadooda ay ku hartay wareegyadii Koowaad iyo labaad ee doorashada.
Musharax Saciid Cabdullaahi Deni iyo Generaal Asad Cismaan ayaa ku tartamaya helida 7 cod oo xildhibaanada baarlamaanka ah, kuwaasi oo u codeeyay Faarax Cali Shire oo ku haray wareegii labaad ee doorashada.
Tartanka labada Musharax ayaa adkaanaya haddii aysan iska lumin codadka ay hadda kala heystaan oo ah Generaal Asad oo heysta 30 cod iyo Saciid Deni oo heysta 29 cod.
Wareega ugu dambeeya ayaa natiijadiisa waxay noqoneysaa cod hal dheeri ah, waxaana aad loo wada xasuustaa wareegii ugu dambeeyay doorashadii 2014 ka dhacday magaalada Garowe oo Madaxweyne Gaas iyo C/raxmaan Faroole ku kala hareen hal cod oo kaliya.
Saciid Cabdullaahi Deni ayaa u baahan helida shan cod oo kamid ah todobadii cod ee uu helay Faarax Cali Shire, Halka Generaal Asad uu u baahan yahay inuu helo 4 cod si uu u noqdo madaxweynaha Puntland, waana haddii labadooda aysan iska lumin codadka ay heystaan.
La soco doorashada Puntland
Caasimada Online
Xafiiska Puntland
[email protected]