Hargeysa (Caasimada Online) ― Madaxweynaha Somaliland, Muuse Biixi Cabdi ayaa maanta waxa uu si rasmi ah ugu dhawaaqay inuu cafiyey dhamaanba ciidamadii la socotay Korneyl Saciid Caare.
Madaxweyne Biixi ayaa waxa kale oo uu sheegay in cafinta Korneyl Caare loo baahanyahay in la raaco sharciyad, isagoona xusay in ciidamada iyo saraakiishoodu ay kala kiis yihiin.
Biixi ayaa sidoo kale waxa uu cafinta Korneyl Caare ku xiray in uu isku soo dhiibo Somaliland, isla markaana uu ka soo laabto fikirka jabhadiisa.
“Ciidamadu waxa ay u kala qaybsan yihiin saraakiil iyo askar, waana kala kiis, innamada halkaas jooga sarkaalka sare mooyaane intooda kale dhammaantood wax allah wixii qaranku dembi u haystay waan ka saamaxay, sharcigaana ii oggol” ayuu yiri Madaxweyne Muuse Biixi.
Wuxuuna intaas kusii daray ” Gaashaanlaha sare ee hoggaaminaya waxaynnu u baahannahay inaad iisoo martaan sharci aan ku saamixi karo, qofku markuu xidhan yahay oo dembigii uu qaatay oo uu xabsi ku jiro oo laga fikiro qofkii dembigii wuu ka baxay Saamax iyo qofkii dalka ma joogo”.
Talaabadan uu maanta Madaxweyne Muuse Biixi cafiska ugu fidiyay ciidamada jabhada Korneyl Caare, ayaa waxay u muuqata hab xeeladeysan oo ay Xukuumada Somaliland ku rabto inay ku kala dirto jabhada Korneyl Caare, isla markaana isagu isku soo dhiibo xukuumadooda.
Xafiiska Hargeysa
[email protected]