Alexandria (Caasimada Online) – Nin Pakistani ah ayaa Khamiistii lagu helay dambi ah ka qaybqaadasho tahriibin hub Iranian ah oo loo waday fallaagada Xuutiyiinta, kaddib markii lagu qabtay howlgal militari sanadkii hore oo sababay dhimashada laba askari oo ka tirsan ciidamada gaarka ah ee Mareykanka (Navy SEALs), sida ay sheegtay Waaxda Caddaaladda ee Mareykanka.
Ninkan, oo lagu magacaabo Muhammad Pahlawan, 49 jir ah, ayaa ahaa taliyaha doon yar oo ay ciidamada badda Mareykanka ee USS Lewis B. Puller ku qabteen xeebaha Soomaaliya bishii Janaayo 2024, sida ay sheegeen dacwad-oogayaasha.
Markii ay doonidaasi galeen ciidamo ka tirsan SEAL-ka iyo Ilaalada Xeebaha Mareykanka, waxay ka heleen “qalab gantaalaha ballistic-ga ah, qalab gantaalaha lidka maraakiibta ah iyo madaxyo-hub,” kuwaasoo la mid ah kuwa ay Xuutiyiintu u adeegsadeen weerarada ay ku hayaan maraakiibta ganacsiga iyo kuwa ciidamada ee Badda Cas.
Mr. Pahlawan ayaa la qabtay isagoo ay la socdaan saddex nin oo kale. Dacwad-oogayaashu waxay sheegeen inuu la shaqaynayey laba walaalo ah oo u dhashay Iran kuna xiran Ciidanka Ilaalada Kacaanka Islaamiga (IRGC), si loo tahriibiyo hubka Iran lagaga soo daabulo loona geeyo xeebaha Soomaaliya.
Waxay intaa ku dareen in markabkiisu uu diyaar u ahaa inuu hubka ku wareejiyo markab kale si loogu sii gudbiyo hoggaamiyeyaasha Xuutiyiinta ee Yemen, xilli la qabtay.
Sidoo kale, dacwad-oogayaashu waxay xuseen in Mr. Pahlawan uu sameeyey dhowr safar oo tahriib ah intii u dhaxaysay Agoosto 2023 ilaa Janaayo 2024.
Dukumentiyada maxkamadda waxaa lagu xusay faahfaahin lama filaan ah oo aan si cad loo sharraxin: ciidamada ammaanka Iran ayaa horay u xiray Mr. Pahlawan iyo shaqaalihiisa toddobaadyo ka hor inta aan la qabanin, kaddib markii doontiisu ay ku noqotay Iran bishii December 2023 kaddib safar tahriib ah. Wuxuu si xor ah uga baxay xabsiga, isagoo mar kale bilaabay howlgaladiisii, sida lagu sheegay dacwadda.
Guddiga garsoorka federaalka ee gobolka Virginia ayaa Mr. Pahlawan ku helay dambiyo ay ka mid yihiin: is-afgarad uu ku taageerayo kooxaha argagixisada iyo Ciidanka Ilaalada Kacaanka Iran, iyo sidoo kale inuu ku hanjabay nolosha shaqaalihiisa iyo qoysaskooda markii doonidiisa la baarayey.
Dhammaan dambiyada lagu helay waxay xambaarsan yihiin xukun ugu badnaan ah 20 sano oo xabsi ah, sida uu sheegay Waaxda Caddaaladda. Xukunka rasmiga ah ayaa la filayaa bisha September.
Markii ciidamada SEAL ay isku dayayeen inay fuulaan doonida Mr. Pahlawan sanadkii hore, hal askari ayaa si lama filaan ah uga siibtay jaranjarta fuulista ama waxaa qaaday hir xooggan, sida ay sheegeen saraakiisha. Askari kale ayaa badda ugu booday si uu u badbaadiyo saaxiibkiis, balse labadooduba way la degeen biyaha. Ciidamada badda Mareykanka ayaa ugu dambeyn shaaciyey in ay dhinteen, iyadoo meydkoodii aan la helin.
Baaritaan ay sameeyeen ciidamada badda Mareykanka ayaa lagu sheegay in dhimashada labadan askari ay ahayd mid laga hortegi karay.
Warbixintii ugu dambeysay ee baaritaanka ayaa si adag u dhaleeceysay tababarka iyo hannaanka howlgalka, iyadoo lagu xusay in labada askari ay si degdeg ah ugu quuseen Badda oo ay hirar xooggan ka jireen, sababtuna ahayd qalab culus oo ay wateen kaasoo aad u miisaanaa.