Muqdisho (Caasimada Online) – Guddiyada wadahallada ee Dowladda Federaalka Soomaaliya iyo Golaha Mustaqbalka Soomaaliyeed ayaa maanta kulan gaar a la yeeshay xubno metalayey qeybaha kala duwan bulshada sida, culimada, odayaasha dhaqanka iyo bulshada rayidka ah ee Soomaaliyeed.
Inta uu socday kulanka waxay dhinacyadu is-weydaarsadeen xogo iyo warbixinno ku saabsan heerka diyaargarowga gogosha wadahadallada, kuwaas oo ku qabsoomay jawi isfahan iyo is-ixtiraam leh.
Sidoo kale, gudiyadda diyaargarowga shirka wadahadaladda ayaa waxa ay u mahadceliyeen culimada, odayaasha dhaqanka iyo bulshada rayidka ah oo qaatay doorkooda, iyada oo la tixgelinayo talooyinkooda iyo daneyntooda masuuliyadeed ee ay ka muujinayaan geeddisocodka wadahadallada arimaha masiiriga ah ee dalka.
Dhanka kale, Gudoomiyaha Dallada Ururada Bushada rayidka Mudane Cismaan Shaatax oo warsaxaafadeed soo saaray ayaa sheegay in aragtidooda iyo talooyinkooda ay ku biiriyeen guddiyada, si ay wada-hadallada u noqdaan kuwa guuleysta, maadaama looga hadlayo xaaladda kala guurka ah ee dalka.
“Waxaan manta kulan la qaadaney xubnaha labada guddi ee farsamada kuwaas oo ka socdey dowladda federaalka iyo golaha mustaqbalka Soomaliyeed. Shirka oo ay I weheliyeen xubno ka socda duubabka dhaqanka, culumo udiinka iyo bulshadda rayidka ayaa waxa looga hadlaayey sidii gogosha wadahadalada loo balansan yahay 2 Bisha Fabraayo u noqon laheyd mid lagu guuleysto” ayuu yiri Cismaan Shaatax.
Sidoo kale wuxuu intaasi ku daray in guddiyada ay la wadaageen in lasii wado dadaalka, lana xoojiyo kalsoonida shacabka, si looga gudbo caqabada taagan.
“Xubnaha bulshada rayidka, kuwa dhaqanka iyo culumo udiinka ayaa diirada saarey sidii aan wax sharuud ah lagu xirin wada hadalada isla markaasna wixii caqabad ah Meesha looga saari lahaa. Waxa kale oo aan kala hadalney labada guddi kaalinta bulshada rayidka eek or joogteynta wada hadalada si wixii cuslaado ay kaalin dhexdhexaadin uga qayb qaadan lahaayeen. Waxaan la wadaagney xubnaha labada guddi muhiimada ay leedahey in la xoojiyo kalsoonida shacabka ay ku qabi karaan gogosha taas oo ku imaan karto kor joogteynta xubnaha bulshada rayidka ee gogosha wada hadalka” ayuu raaciyay.
Waxaa kale oo uu kusii daray “Waxaa lagama maarmaan ah xaqiijinta hirgelinta hishiis laga gaaro wada hadalada taas oo ku imaan karto mas’uuliyad wadareed ay qayb ka yihiin bulshada rayidka”.
