Jalalaqsi (Caasimada Online) – Wararka naga soo gaaraya gobolka Hiiraan ayaa sheegaya in weli xaalad kacsanaan ah ay ka taagan tahay degmada Jalalaqsi, halkaas oo saddexdii maalmood ay lasoo dhaafay ay ka dhaceen dagaallo xooggan oo u dhexeeyo labada maleeshiyo beeleed oo ku wada sugan degmadaasi.
Maleeshiyaadka labada dhinac ayaa lagu soo warramayaa in saaka ay isku horfadhiyaan gudaha Jalalaqsi, iyada oo mar kasta la filan karo in dagaalka uu qarxo, maadaama dhinacyadu ay wadaan is uruursi iyo gurmadyo ciidan.
Intii ay socdeen dagaalladan oo ahaa kuwa qaraar waxaa dhashay gabood fallo waa wayn, iyada oo dhimashada iyo dhaawaca uu tiro beel yahay. Waxaa sidoo kale la gubay guryo badan oo ku yaallay degmada Jalalaqsi ee gobolka Hiiraan, sida ay sheegayaan ilo dadka deegaanka oo lagu kalsoonaan karo.
Muuqaallo lagu baahiyay baraha bulshada ayaa muujinayo maleeshiyaadka iyo dad kale oo shacab ah oo gubaya guryo laga barakacay, waxaynta taas kordhisay saameynta dagaalkan oo kusii fidaya aagga degmada Jalalaqsi.
Dhinaca kale, Madaxtooyada Hirshabelle oo warsaxaafadeed soo saartay ayaa baaq nabadeed u dirtay dadka walaalaha ah ee ku diriraya halkaasi, iyada oo dalbaday in si shuruud la’aan ah oo deg-deg ah loo joojiyo dagaalkaasi.
HirShabelle ayaa sidoo kale farriin u dirtay odayaasha dhaqanka iyo waxgaradka deegaanka oo ay ugu baaqday inay u istaagaan, sidii looga hortagi lahaa colaadan oo durbaba saameynteeda laga dareemay gobolka Hiiraan.
“Dowladda HirShabelle waxay aad uga xun tahay colaadda iyo dhibaatada dhexmartay dadka walaalaha ah ee dariska ah,” ayaa lagu yiri bayaanka.
