New York (Caasimada Online) – Dowladda Iiraan ayaa si adag u cambaareysay hadallo kasoo yeeray Wasiirka Difaaca Israa’iil, Israel Katz oo Tehran ay ku tilmaantay hanjabaad toos ah oo ka dhan ah hoggaankeeda.
Ergeyga Joogtada ah ee Iiraan u fadhiya Qaramada Midoobay, Amiir Saciid Iravaani ayaa warqad rasmi ah u diray Xoghayaha Guud ee Qaramada Midoobay, António Guterres iyo Guddoomiyaha Golaha Ammaanka, isagoo ka codsaday inay si degdeg ah uga falceliyaan waxa uu ku tilmaamay hanjabaado khatar ku ah nabadda iyo amniga caalamiga ah.
Warqadda uu diray Iravaani ayaa lagu cambaareeyay hadallada Wasiirka Difaaca Israa’iil ee ku wajahnaa Mojtaba Khamenei, oo ah Hoggaamiyaha Sare ee Iiraan. Dowladda Iiraan ayaa sheegtay in hadalladaasi ay yihiin xad-gudub cad oo ka dhan ah sharciga caalamiga ah.
Ergeyga Iiraan ayaa ku tilmaamay hadalka Katz ee ahaa in Mojtaba Khamenei uu yahay “bartilmaameed la doonayo in la dilo” inuu yahay “caddeyn muuqata oo muujinaysa argagixiso dowladeed” iyo jebin cad oo lagu sameeyay Axdiga Qaramada Midoobay.
Iravaani ayaa sidoo kale sheegay in hanjabaaddan ay qayb ka tahay siyaasad nidaamsan oo Israa’iil ay ku beegsaneyso kuna khaarijineyso mas’uuliyiinta sare ee Jamhuuriyadda Islaamiga ah ee Iiraan. Wuxuu intaas ku daray in aamusnaanta Golaha Ammaanka ay dhiirrigelin u noqotay Israa’iil inay sii waddo falalka ay Tehran ku eedeyneyso.
Dhanka kale, Wasiirka Arrimaha Dibadda ee Iiraan, Cabbaas Caraqji ayaa sheegay in hanjabaad kasta oo loo geysto shacabka ama hoggaanka dalkiisa ay la kulmi doonto “jawaab degdeg ah oo adag,” isagoo uga digay Israa’iil inay sii waddo hadallada iyo tallaabooyinka noocaas ah.
Caraqji ayaa sidoo kale sheegay in Madaxweynaha Mareykanka uu hore u ballan-qaaday inuu xakameyn doono Israa’iil, isagoo xusay in haddii taas ay dhici weydo, Iiraan ay qaadi doonto tallaabooyin ay isku difaaceyso.
Dhacdadan ayaa si weyn u soo jiidatay indhaha caalamka, iyadoo warbaahinta caalamiga ah ay si ballaaran u tabisay warqadda ay Iiraan u dirtay Qaramada Midoobay iyo eedeymaha culus ee ay u jeedisay Israa’iil.
Warbixinno laga daabacay dibadda ayaa tilmaamay in Tehran ay ku doodayso in hanjabaadaha ka dhanka ah hoggaankeeda ay sii hurin karaan xiisadda gobolka, isla markaana ay jebinayaan xeerarka caalamiga ah ee mamnuucaya hanjabaadaha ka dhanka ah madaxda dowladaha.
Iiraan ayaa la sheegay inay Qaramada Midoobay ka dalbatay in si cad u cambaareyso hadallada Israa’iil, isla markaana ay qaaddo tallaabooyin looga hortagayo wax kasta oo sii hurin kara colaadda u dhexeysa labada dal.
Hadallada labada dhinac ayaa muujinayaa heerka sare ee xiisadda u dhexeysa Tehran iyo Tel Aviv, iyadoo ay sii kordhayaan walaacyada laga qabo isku dhac hor leh oo gobolka ka qarxa. Si kastaba, Qaramada Midoobay ayaa weli si rasmi ah uga jawaabin warqadda ay dirtay dowladda Iiraan.
Xiisaddan cusub ayaa ku soo beegmeysa xilli gobolka Bariga Dhexe uu wajahayo xaalad amni oo aad u cakiran, iyadoo beesha caalamka ay sii waddo dadaallada lagu doonayo in laga hortago isku dhac ballaaran oo ka dhex qarxa Iiraan iyo Israa’iil.
Arrimahan ayaa muujinaya in xiisadda u dhexeysa labada dal ay weli taagan tahay, inkastoo ay jiraan baaqyo caalami ah oo lagu dalbanayo in la dejiyo xaaladda, lagana fogaado tallaabo kasta oo horseedi karta dagaal cusub oo dib uga qarxa gobolka.