Dhuusamareeb (Caasimada Online) – Faah-faahinno dheeraad ah ayaa waxaa laga helayaa dhacdo cajiib ah oo ay si deg-deg ah uga falceliyeen shacabka Dhuusamareeb, kadib markii askari ka tirsan ciidamada dowladda uu maanta goob fagaare ugu gacan qaaday wiil Caseeye ah, taas oo dhalisay caro xooggan.
Askariga oo ku sugnaa maqaayad ku taalla bartamaha caasimada Galmudug ayaa dharbaaxo ku dhuftay wiilka Baalashlaha. Arrintaas ayaa dhalisay inay ka caroodaan shacabkii ku sugnaa goobta oo iyaguna qaaday tallaabo deg-deg ah.
Dhalinyaro ku sugnayd goobta uu falku ka dhacay ayaa durbo qabtay askariga, kadibna ka qaaday qorayga, iyada oo si weyn loogu bogaadiyay sida ay uga falceliyeen falka.
Dhacdadan ayaa noqotay mid si weyn loogu hadal hayo baraha bulshada, iyadoo qaar ka mid ah dadka ka falceliyay ay ku tilmaameen in shacabka ay muujiyeen diidmo ka dhan ah tacaddiga loo gaystay wiilka yar ee usoo baxay inuu u shaqeeyo reerkiisa.
Dadweynaha ayaa sidoo kale ku baaqay in dhacdada loo maro waddo sharci ah, isla markaana tallaabo adag laga qaado askariga xadgudubka gaystay.
Xamdi Cali “Soomaalida waxaa ku jeclahey damiirka guuleysata meel kasta oo aad joogtaan Soomaaliyeey”.
Maxamed Axmed: “Kaas cidda markii horeba Qoriga u dhiibtay ayaa qaldanayd”.
Cabdinaasir Saciid Sandheere: “Askar maahan waa mooryaan hala xiro”.
Si kastaba ha’ahaatee, Ilaa iyo hadda ma jiro war rasmi ah oo kasoo baxay hay’adaha ammaanka Dhuusamareeb iyo mas’uuliyiinta Galmudug oo ku aadan falka dhacay iyo haddii tallaabo sharci laga qaadayo askariga gaystay.