Muqdisho (Caasimada Online) Magaalada Muqdisho waxaa maanta lagu qabtay shir ay soo qaban qaabiyeen hey’adda culimada Soomaaliyeed.
Guddoomiyaha hey’addaas Sheekh Bashiir Axmed Salaad oo la hadlay Saxaafadda ayaa sheegay in shirkooda ay uga hadlayaan afar qoddob oo kala ah, Dhibaatadii ay geesteen dabeelo iyo roobab xooggan oo ku dhuftay Bariga Soomaaliya, siddii gurmad loo gaarsiin lahaa dadkii wax ku noqday fatahaada Wabiga Shabeelle, Khilaafka soo kala dhex galaya madaxda dowladda Fedaraalka Soomaaliya iyo siddii gurmad loo gaarsiin lahaa dadka ay saameeyeen dabeelaha iyo roobabka ku dhuftay deegannada Puntland.
Ugu horreyn wuxuu ka tacsiyeeyay dadka ku dhintay dabeelaha roobabka wata ee ku dhuftay deegannada Puntland, wuxuu kaloo sheegay in ay magacabeen guddi soo qiimeeya dhibaatada ay geesteen roobabkaas kuwaasoo tegi doona goobaha ay wax yeelada ay ka dhasheen.
Guddoomiye ku xigeenka Hey’adda, Sheekh Nuur Baaruud Gurxan ayaa sheegay in ay ka xun yihiin khilaafka soo kala dhexgalaay madaxweynaha iyo ra’iisal wasaarihiisa, wuxuu sheegay in dadka Soomaalida ay ka soo daaleen khilaaf loona baahan yahay wax qabad.
Wuxuu sheegay in ciddii loo arko in aysan waxbo qabaneynin in meesha isaga tagto oo la keeno qof wax qabanaya sida uu hadalka u dhigay.
Halkaan Hoose ka dhageyso codadka hey’ada Culimada Somalied
Caasimada Online
Xafiiska Wararka Muqdisho