Muqdisho (Caasimada Online) Waxaa goordhow lagu wadaa in xarunta golaha shacabka ee magaalada Muqdisho uu ka billowdo kulankii xildhibaannada baarlamaanka, kaasoo looga dooddayo mooshinka laga keenay raysal wasaaraha Soomaaliya.
Waa maalintii seddaxaad oo kulankan uu qabsoomo, maalintii shaley waxaa mooshinka raysal wasaaraha ka hadlay oo fikirkooda ka dhiibtay 31-mudane, kuwaasoo isugu jiray kuwa taageersan raysal wasaaraha iyo kuwa ka soo horjeeda.
Fadhigga shaley aad u xasaasi u ahaa, waxaana la isku weedaarsaday dooddo kulul, kuwaasoo mararka qaar guddoonka baarlamaanka ka tan weynaa.
Si kastaba, waxaa maanta la filayaa in la dhammeestiro dooddoa mooshinka ka dhanka ah raysal wasaaraha, waxaana la guda galin doonaa in cod loo qaado.
Ma cadd sida ay wax noqon karaan, waxaana wax kasta ay ku xiran yihiin mudanayaasha baarlamaanka kuwaasoo hadda uu hor yaallo labo qiyaar oo culus.
Dadka reer Muqdisho ayaa aad u hadal haya doodda xildhibaannada, waxaana la adkeeyay ammaanka magaalada gaar ahaan xarunta golaha shacabka.
Wixii ku soo kordha kala socda shabakadda Caasimada Online oo wariyaal dhowr ah ay ka joogaan xarunta baarlamanka.
Mahadsanidiin