Qudus (Caasimada Online) – Ra’iisul Wasaaraha Israa’iil, Benjamin Netanyahu ayaa sheegay in dalkiisu uu la kulmayo caqabado la mid ah kuwa uu wajahayo Somaliland, isagoo tilmaamay in labada dhinacba ay raadinayaan aqoonsi.
Netanyahu ayaa hadalkan ka sheegay shir jaraa’id oo uu si wadajir ah ula qabtay Madaxweynaha Somaliland, Cabdiraxmaan Maxamed Cabdullaahi (Cirro) kadib kulan ay ku yeesheen magaalada Qudus ee ay haysato Israa’iil.
Ra’iisul Wasaare Netanyahu ayaa sheegay in sida Somaliland ay u doonayso aqoonsi caalami ah ay sidoo kale Israa’iil ugu ololeyneyso in magaalada Qudus loo aqoonsado caasimaddeeda.
“Sida ay Somaliland u raadinayso in la aqoonsado, ayaan annaguna u raadinaynaa in naloo aqoonsado Qudus,” ayuu yiri Ra’iisul Wasaare Netanyahu, isaga oo dhinac taagnaa Madaxweyne Cabdiraxmaan Cirro.
Hadalkan ayaa imanaya xilli Israa’iil ay muddo dheer wadday dadaallo diblomaasiyadeed oo ay ku doonayso in dalalka caalamku u aqoonsadaan Qudus inay tahay caasimaddeeda rasmiga ah, hase yeeshee inta badan dalalka caalamka ayaa ka biyo diiday arrintaas.
Inta badan waddamada caalamka iyo hay’adaha caalamiga ah ayaa weli ku adkeysanaya in go’aanka kama dambaysta ah ee ku saabsan maqaamka Qudus lagu xalliyo wada-hadallada u dhexeeya Israa’iil iyo Falastiiniyiinta, maadaama magaaladaasi leedahay muhiimad diimeed iyo siyaasadeed oo gaar ah.
Inkastoo Israa’iil ay heshiisyo iskaashi iyo xiriir diblomaasiyadeed la yeelatay dalal kala duwan, haddana dalal badan ayaa ka gaabsaday inay safaaradahooda u wareejiyaan Qudus ama ay ka furtaan magaaladaas.