Beledweyne (Caasimada Online) – Magaalada Beledweyne ee xarunta gobolka Hiiraan ayaa waxaa maanta ka dhacay dibadbax xooggan oo looga soo horjeedo tallaabadii uu qaaday madaxweynaha maamulka HirShabeelle.
Cali Guudlaawe ayaa xalay saq-dhexe soo saaray wareegto uu xilka uga qaaday guddoomiyaha gobolka Hiiraan Cali Jayte Cismaan, oo hormuud u ahaa dagaalka ka dhanka ah kooxda Al-Shabaab.
Dadweynaha reer Hiiraan ee dibadbaxa ka dhigay magaalada Beledweyne ayaa xirtay waddooyinka muhiimka ah ee magaalada, iyaga oo si adag uga horyimid xil ka qaadista Jeyte.
Dibad-baxayaasha oo qaarkood la hadleen warbaahinta ayaa Jeyte ku sifeeyay nin qadiyad leh, islamarkaana ay tahay inay reer Hiiraan midooban oo hal noqdaan, islamarkaana ay ka tashadaan maamulka HirShabeelle ee Cali Guudlaawe.
“Reer Hiiraan ee imaqleysa waxaa leeyahay haddii laba la yahay waxba lama qabsan karo marka hore waa in isku mid noqdaan oo qadiyadoooda ka hadlaan, kana tashadaan Cali Guudlaawe. Cali Jeyte waa nin qadiyad leh oo ninka qadiyada leh looma baahna dadka runta ma rabo,” ayay tiri haweenay kamid ah dadka dhigayay dibadbaxa.
Mid kale ayaa sidoo kale waxa uu yiri “Iyada oo qaban-qaabadii wejiga labaad lagu jiro waxaa soo bedelay halgamayaasheeni dalka in xilalka laga qaado, ma qaadan karno haddaa nahay reer Hiiraan.”
Waxay ka dalbadeen madaxda sare ee dowladda federaalka Soomaaliya oo ugu sarreeyo madaxweyne Xasan Sheekh in gobolka Hiiraan uu ka qabto madaxweynaha maamulka HirShabeelle Cali Guudlaawe Xuseen.
“Haddii nalaga qaban waayo waxaa ballan qaadeyna in sidii shalay Shabaab loo laayay mid ka daran. Cali Jeyte xil kama dego oo ugama dego Hiiraan, isaga kala baxay Shabaab oo usoo halgamay Hiiraan.”
Reer Hiiraan ayaa si weyn ugu amaanay Cali Jeyte halgankii uu hormuudka u ahaa ee kooxda Al-Shabaab inta badan looga xoreeyay deegaanada gobolka Hiiraan.
“Cali Jeyte hoggaan ayuu u ahaa xoreynta oo warqadii xalay soo tuureen ayaa shucuurteena soo kicisay, xil ka qaadistaas oo aan loo meel dayin oo ah dhabar jabin loogu tala-galay howl-galkii socday.”
Dadka reer Hiiraan ee dhigayay dibad-baxaan xooggan ee looga soo horjeedo xil ka qaadista Cali Jeyte, ayaa si cad u sheegay in aysan yeelayn arrintaan, islamarkaana ay maamulka HirShabeelle ula dagaalami doonaan sida kooxda Al-Shabaab ay ula dagaalameen, sida ay hadalka u dhigeen.
