Muqdisho (Caasimada Online) – Wasiir ku-xigeenka Warfaafinta Cabdiraxmaan Yuusuf Caddaala oo ka hadlay dagaalka kooxda Al-Shabaab ka dhanka ah ayaa sheegay inay jiraan kooxo Al-Shabaab uga daran.
Kooxahaan ayuu sheegay in ay la shaqeeyaan Al-Shabaab, ayna isku dayayaan inay fashiliyaan howl-gallada dagaal ee socda, maadaama ay aaminsan yihiin in aysan noolaan karin Shabaab la’aantood, sida uu hadalka u dhigay.
“Dadka Soomaaliyeed waxaa la wadaageynaa inay illaa billowgii howlgalka ay jireen kooxo abaabulan oo magacyo kala duwan wata oo Khawaarijta la shaqeeya oo kamid ah lakabyada Khawaarijta ku dul nooshahay si dadka Soomaaliyeed u haystaan oo u dhibaateeyaan,” ayuu yiri Wasiir Al-Cadaala.
Sidoo kale waxa uu sheegay in kooxahan ay qeyb ka yihiin siyaasiin, ganacsato iyo kuwa magacyo kala duwan ku dhex jooga bulshada, ay ka shaqeynayaan inay suurad xumeeyaan howl-galka Al-Shabaab ka dhanka ah, iyaga oo colaad ka dhex ridaya qabaa’ilka Soomaaliyeed dhexdooda, sida uu sheegay.
“Wey ku fashilmeen oo Ilaahay ku fashiliyay inay hor istaagan howlgalka. Bilihii dhexe waxay aad iskugu dayeen kooxahaasi inay kala qeybiyaan qabaa’ilka Soomaaliyeed ee Khawaarijta la dagaalamayay, waxaan ognahay in qabaa’ilka qaarkood lacago u direen, in ay siyaasad ahaan u dhex galaan oo dhahaan idinka kuma jirtaan dagaalka ee ka hara, taasina waa ku fashilmeen oo dadka Soomaaliyeed iyaga oo mideysan ayay dagaalka Khawaarijta galeen.”
Al-Cadaala ayaa sidoo kale waxa uu ku eedeeyay kooxahaasi ay wadaan isku-deygoodii u dambeeyay, kaasi oo ah inay baranbogaado iyo been abuur la dhex-galaan ciidanka qaranka ee dagaalka ku jira.
“Waxaa dadka Soomaaliyeed u sheegaynaa in isku-deygoodii u dambeeyay ee doonayeen in Khawaarijta ku badbaadiyaan oo shacabka Soomaaliyeed uga jeediyaan guulaha aan la qarin karin ee laga gaaray furimaha Khawaarijta, in isagana uu fashilmay oo uu meel mar uu noqon waayay isku-deygooda.”
Waxa uu intaas kusii daray “Dadkaas idinku dhex jira ee siyaasiyiinta, qoraayaasha, ganacsatada iyo magacyada kala duwan idin sheeganaya ee la yiraahdo Dhabar Khawaarij waa darbiyo ama lakab kamid ah kuwa ay isticmaasho Khawaarijta, waana nuuc aaminsan inay noolaan karaan inta Khawaarijta jirto, dadka Soomaaliyeed waxaa rabnaa in aan fahansiino oo uga digno in aysan rumeysan, beentooda yeysan idin saameyn.”
Ugu dambeyntiina wuxuu digniin u diray kooxahaasi uu sheegay inay la shaqeeyaan Al-Shabaab, “Farriimaha Khawaarijta waa dembi Soomaaliya, nuuc kasta iyo cidkasta oo Khawaarijta adeegeeda haysa waxay kamid tahay Khawaarijta, sidooda kala loola dagaalamaya waana lagu daba jiraa.”
Hoos ka daawo muuqaalka
