Ceerigaabo (Caasimada Online) – Faahfaahino dheeraad ah ayaa kasoo baxaya weerar qorsheysan oo ay maanta dabley hubeysan ka geysatay degmada Dararweyne ee gobolka Sanaag oo maamul ahaan hoostagta Somaliland, kaas oo sababay dhimasho iyo dhaawac.
Dableyda weerarka geysatay oo aan haybtooda la garan ayaa beegsatay maqaaxi ku taalla halkaasi, waxayna rasaas ku fureen dad shacab ah oo ku sugnaa goobtaasi.
Inta la xaqiijiyey waxaa weerarkan ku dhintay ugu yaraan hal qof, ayada oo ay ku dhaawacmeen labo kale oo shacab ah, sida ay innoo xaqiijiyeen ilo deegaanka ah.
Lama oga sababta rasmiga ah ee ka dambeysa dhacdadaan iyo bartilmaameedka kooxda weerarka fulisay oo goobta isaga baxsatay.
Dhanka kale ma jiro wax hadal ah oo ka soo baxay maamulka degmada iyo mas’uuliyiinta Somaliland oo ku aadan falkaasi ka dhacay degmada Dararwayne ee gobolka Sanaag.
Xaaladda ayaa haatan ah mid deggan, waxaan baaritaano dheeraad ah wada ciidamada Somaliland oo bilaabay howlgal lagu baadi goobayo dableyda geysatay weerarkaas.
Deegaanada Somaliland ayaa waxaa mararka qaar ka dhaca weeraro hubeysan, kuwaas oo qaarkood salka ku hayo aanooyin Qabiil oo ka taagan gobollada Sool iyo Sanaag.
Si kastaba, weerarkii ugu dambeeyey ayaa magaalada Hargeysa ka dhacay 13-kii August, kadib markii uu nin afka soo duubtay oo cararaya uu dad rayid ah xabad kula furay gudaha magaaladaasi, waxaana ku dhintay ugu yaraan hal qof, ayada oo uu ku dhaawacmay qof kale.
