Garoowe (Caasimada Online) – Madaxweynayaasha maamullada Jubaland iyo Puntland oo shir xasaasi ah ku yeeshay magaalada Garoowe ayaa soo saaray war-murtiyeed ka kooban 11 qodob, iyaga oo go’aan culus ka qaatay dowladda federaalka ee uu hoggaamiyo Madaxweyne Xasan Sheekh.
War-murtiyeedka ayaa lagu faah-faahiyay shirka Axmed Madoobe iyo Saciid Deni oo socday intii u dhexeysay 23-kii, illaa 25-kii bishaan, kadib markii ay isugu tageen Garoowe, waxaana diirada lagu saaray xaaladda guud ee dalka, anmniga, dagaalka ka dhanka ah argagixisada, arrimaha doorashooyinka 2026 iyo wax ka beddalka Dastuurka KMG ah.
Ugu horreyn waxa ay boggaadiyeen guulaha ay ciidamada Jubaland iyo kuwa Puntland ka gaareen dagaalka ay kula jiraan kooxaha Al-Shabaab iyo Daacish, iyaga oo sidoo kale guul u rajeeyay ciidamada Xoogga iyo kuwa deegaanka ee howlgallada ka wada gobollada kale ee dalka.
Jubaland iyo Puntland ayaa sidoo kale ku heshiiyay inay midoobaan, isla markaana ay meel uga soo wada jeestaan sidii ay Soomaaliya u gaari lahayd isku filnaan iyo in la helo hannaan lagu xoojinayo nidaamka federaalka ee dalka.
“Dowladaha Jubaland iyo Puntland waxay ku heshiyeen in ay u midoobaan, meelna ay uga soo wada jeestaan sidii ay Soomaaliya u gaari lahayd dowladnimo dhammeystiran oo ku dhisan hannaanka federaaliga ah, dimuquraadi ah, nabadna ah” ayaa lagu yiri bayaanka.
Waxaa kale oo ay isku raaceen in waxba kama jiraan ay tahay wax ka beddelka lagu sameeyay Dastuurka KMG ah, iyaga oo ku dooday in hay’adaha dowladda federaalka aanay awood lahayn, maadaama afti dadweyne lagu sameeyay, laguna beddeli karo heshiis bulsho oo kaliya.
“Sidoo kale dowladaha Jubaland iyo Puntland ma aqoonsana wax kasta oo ka dhashay wax ka beddelka lagu sameeyay Dastuurka” ayaa mar kale lagu yiri war-saxaafadeedka.
Hoggaamiyeyaasha Jubaland iyo Puntland ayaa sidoo kale ka horyimid qorshaha Madaxweyne Xasan Sheekh Maxamuud ee qof iyo cod, waxayna ugu baaqeen inuu ilaaliyo Dastuurka heshiiska lagu yahay iyo midnimada guud ee dalka.
“Dowladaha Jubaland iyo Puntland waxa ay ugu baaqayaan Madaxweynaha JFS inuu ixtiraamo Dastuurkii lagu heshiiyay 2012-kii, ilaaliyana midnimada iyo wadajirka ummadda Soomaaliyeed” ayaa lasii raaciyay war-murtiyeedka.
Labada hoggaamiye ayaa sidoo kale mowqif adag ka qaatay dowladda dhexe, waxayna si cad u sheegeen in aanay ku metalin go’aannada masiiriga ah ee la gaarayo, maadaama aanay qayb ka ahayn oo ay mar hore xiriirka u jareen Villa Soomaaliya.
“Waxaa kale oo dowladaha Jubaland iyo Puntland cadeynayaan in DFS aysan ku metalin wixii go’aan ah oo Jubaland iyo Puntland aysan qayb ka ahayn” ayaa mar kale lagu yiri.
Axmed Madoobe iyo Saciid Deni ayaa dhanka kale farriin culus u diray maamu-goboleedyada, waxayna ugu baaqeen inay qabtaan doorashooyinka golaha wakiilada iyo midda madaxweynaha, maadaama uu dhammaaday mudo xileedkooda sharciga ah. Waxaa kale oo ay ugu baaqeen inay qabtaan doorashooyin toos ah oo lagu soo dooranayo goleyaasha deegaanka, si lamid ah tii ka dhacday deegaannada maamulka Puntland.
Ugu dambeyn waxa ay farriin isku mid ah u direen xubnaha mucaaradka ee la baxay Madasha Samatabixinta iyo Wakiilada Beesha Caalamka oo ay ugu baaqeen in dadaalkooda ay sii wadaan, si loo qabto doorasho loo dhan oo ay ka qayb-galaan dhinacyada oo dhan.
