Muqdisho (Caasimada Online) – Dowladda Federaalka Soomaaliya ayaa soo saartay digniin ku socota kalluumeysatada iyo shacabka Soomaaliyeed ee degan dhulka xeebaha ah, taasi oo ku saabsan bad-xireenka la galay.
Warbaahinta Muqdisho ayaa saakay tebisay codadka waalidiin cabanaya oo jooga xeebta Liido, kuwaas oo carruurtoodii ay baddu qaaday Jimicihii shalay, xilli ay halkaas ku dabaalanayeen.
“Wasaaradda kalluumeysiga iyo dhaqaalaha Buluugga ah ee XFS, waxay si rasmi ah ugu wargalineysaa dhammaan kalluumeysatada iyo guud ahaan dadweynaha Soomaaliyeed in lagu jiro xilli badda ay si weyn u kacsan tahay, taasoo keeni karta xaalado khatar ah oo halis gelin kara badbaadada doomaha iyo dadka ku sugan badda,” ayaa lagu yiri qoraalka.
Wasaaradda ayaa sheegtay in digniintaan ay si toos ah ugu socoto dadka ku shaqeysta doomaha yaryar ee ku jira badda, kuwaas oo ku hawlan kalluumaysiga iyo howlaha kale, sida safarrada.
“Inta lagu jiro xilligan kacsanaanta badda, waxaa dhici karta khatar badan, shilalka badda iyo waxyeelada soo gaarta doomaha iyo kalluumeysatada,” ayaa lagu yiri Qoraalka.
Wasaaradda Kalluumeysiga ayaa sidoo kale ugu baaqday dadweynaha in laga fogaado dhaqdhaqaagyada xeebaha, sida dabaasha iyo in laga agdhawaado xeebaha xilligan badxireenka ah.
“Si looga hortago halista ay keeni karaan mowjadaha xooggan iyo xaaladaha cimilada oo aan degganayn, waxaan cod dheer dadkeena ugu sheegeynaa inay ka fogaadaan badda,” ayaa lagu yiri qoraalka.
Qoraalkaan ka soo baxay dowladda ayaa ku soo aadaya, iyadoo Jimcihii shalay xeebta Liido ee magaalada Muqdisho ay qaaday ugu yaraan sagaal carruur ah, kuwaas oo u damaashaad tegay, carruurtaas ayey baddu qaaday xilli ay caadi u dabaalanayeen.