Tehran (Caasimada Online) – Dowladda Iiraan ayaa sheegatay inay soo ridday diyaarad dagaal oo nooca MQ-9 Reaper ah oo uu leeyahay Mareykanka, xilli ay sii xoogeysanayaan iska hor imaadyada militari ee u dhexeeya Tehran iyo Washington.
Iiraan waxay sheegtay in diyaaradda la soo riday ay ku duuleysay hawada magaalada Andimeshk ka hor inta aan la beegsan.
Sida lagu sheegay bayaan ay soo saareen Ciidanka Ilaalada Kacaanka Islaamiga ah ee Iiraan (IRGC), diyaaradda ayaa lagu soo riday nidaam casri ah oo difaaca cirka ah. Ciidamadu waxay ku tilmaameen howlgalka mid looga hortegay waxa ay ugu yeereen xad-gudub lagu sameeyay hawada dalka.
Wakaaladda wararka ee Tasnim, oo xiriir dhow la leh IRGC ayaa baahisay in howlgalka lagu burburiyay diyaaradda MQ-9 uu si buuxda u guuleystay. Si kastaba ha ahaatee, warbaahinta Iiraan ma aysan soo bandhigin wax sawirro ah ama caddeymo kale oo si madax-bannaan u xaqiijinaya sheegashadaas.
Dhanka kale, Mareykanka iyo Taliska Dhexe ee Ciidamada Mareykanka (CENTCOM) ayaan weli si rasmi ah uga hadlin sheegashada Iiraan. Ilaa iyo hadda, ma jiro wax war ah oo ka soo baxay Washington oo xaqiijinaya ama beeninaya in diyaarad nooca MQ-9 ah laga soo riday gudaha Iiraan.
Si kastaba, xiisadda gobolka ayaa sii ballaaranaysa, iyadoo Urdun ay ku dhawaaqday inay hawadeeda ku qabatay tiro gantaallo ah oo Iiraan laga soo ganay, xilli dalalka gobolka ay sare u qaadeen heegankooda amni, cabsi laga qabo in dagaalku ku fido dalal kale.
Wakaaladda wararka ee Petra ee Urdun oo soo xiganeysa ciidamada qalabka sida ee dalkaas ayaa sheegtay in siddeed gantaal oo Iiraan ay ridday lagu qabtay laguna burburiyay hawada Urdun, ka hor inta aysan gaarin bartilmaameedkoodii.
Milatariga Urdun ayaa sheegay in howlgalka lagu qabtay gantaalladaasi uusan sababin wax dhimasho ah ama khasaare hantiyeed. Waxay intaas ku dareen in ciidamada difaaca cirka ay sii wadi doonaan ilaalinta hawada dalka, iyagoo adeegsanaya dhammaan awoodaha jira.
Dhanka kale, militariga Iiraan ayaa hore u sheegay inay adeegsadeen diyaaradaha aan duuliyaha lahayn si ay u beegsadaan nidaamyada isgaarsiinta, xarun raadaar oo joogto ah iyo bakhaarro shidaal oo ay leeyihiin ciidamada Mareykanka, kuwaas oo ku yaalla saldhigga cirka ee Al-Azraq ee dalka Urdun. Sheegashadaas ayaan sidoo kale si madax-bannaan loo xaqiijin.
Isweydaarsiga eedeymaha iyo weerarrada u dhexeeya Mareykanka iyo Iiraan ayaa sii kordhinaya walaaca laga qabo amniga Bariga Dhexe, iyadoo khubarada ay ka digayaan in colaadda sii fidaysa ay saameyn ku yeelan karto dalalka deriska ah, isu-socodka maraakiibta caalamiga ah iyo xasilloonida gobolka oo dhan.