Tel Aviv (Caasimada Online) – Madaxweynaha Israa’iil, Isaac Herzog ayaa shaaca ka qaaday in Israa’iil ay ku jirto maalin adag oo murugo leh, kadib markii dagaal ka dhacay koonfurta Lubnaan ay ku dhinteen sarkaal sare iyo saddex askari oo kale.
Herzog ayaa sheegay in khasaarahan uu yahay mid xanuun badan, isagoo tacsi u diray qoysaska iyo ehellada askarta la dilay.
Sida ay sheegeen militariga Israa’iil iyo warbaahinta gudaha, dhimashada askartan ayaa ka dhalatay weerar lagu qaaday taangi ay lahaayeen ciidamada Israa’iil.
Wararka ayaa tilmaamaya in taangigaasi uu qarxiyay ururka Xisbullah ee Lubnaan, xilli uu ku sugnaa deegaanka Kfar Tebnit ee koonfurta dalkaas.
Weerarkaasi waxaa lagu dilay Lt. Col. Dor Gedalia Ben Simhon, oo ahaa taliyaha guutada 52-aad ee ciidamada Israa’iil. Sidoo kale, saddex askari oo kale ayaa ku dhintay weerarka, inkastoo aan weli si rasmi ah loo shaacin magacyadooda.
Dhacdadan ayaa ku soo beegantay xilli Israa’iil ay duqeymo ka wadday koonfurta Lubnaan, kuwaas oo la sheegay inay ku dhinteen ku dhawaad 30 qof, halka dhismayaal badan oo la degganaa ay ku burbureen weerarradaas.
Si kastaba, Israa’iil ayaa haatan qorsheynaysa weerarro burburin ah oo ka dhan ah Lubnaan, xilli xiisadda u dhexeysa Israa’iil iyo Xisbullah ay si xooggan u sii kordhayso. Dagaallada Lubnaan ayaa galay marxalad aad u kacsan tan iyo markii uu billowday isku dhaca ka dhashay dagaalka Gaza, iyadoo Xisbullah ay sheegtay inay taageero u fidineyso Falastiiniyiinta, halka Israa’iil ay ka jawaabeyso weerarro ay ku tilmaamayso “halis amni.”
Arrimahan ayaa imanaya xilli Mareykanka iyo Iiraan ay gaareen heshiis lagu soo afjarayo dagaalka, iyadoo saxiixa heshiiskan ay dibad-joog ka ahayd Israa’iil, oo markii hore dagaalka ku soo jiidday Washington.